శ్రీరామ శతకము - శ్రీమతి కల్లూరి విశాలాక్షమ్మ

శ్రీరామ శతకము

                                         శ్రీమతి కల్లూరి విశాలాక్షమ్మ (1948)

1. కం. శ్రీజానకీమనోహర
రాజేంద్రవిరాజమాన రాజబిడౌజా
రాజితకీర్తివిశాల
రాజీవదళాయతాక్ష రాఘవరామా

2. కం వైదేహీహృదయేశ్వర
యాదిత్యసమప్రకాశ యఖిలాధారా
వేదాంతవేద్య నీశుభ
పాదాబ్జము లాశ్రయింతుఁ బ్రభు! శ్రీరామా

3. కం. ఓకారుణ్యపయోనిధి
నీకంకిత మాచరించి నే నిడితిఁ బ్రభూ
యీకందపద్యశతకముఁ
గైకొని మమ్మేలుమయ్య కరుణను రామా

4. కం. కౌసల్యాప్రియనందన
భాసురసుగుణాలవాల పద్మదళాక్షా
శ్రీసీతాహృదయేశ్వర
కోసలపురనాధ దీనిఁ గొను శ్రీరామా

5. కం. కందర్పకోటిసుందర
యిందీవరనీలగాత్ర యినసమతేజా
వందనము లొనర్చెద నా
నందమ్మున నన్నుఁ బ్రోవు నమ్మితి రామా

6. కం. శ్రీవిఘ్నరాజు మదిలో
సేవించియు శారదాంబ స్ఠిరమతితోడన్
భావించి యిష్టదేవుల
భావంబునఁ బ్రస్తుతించి వ్రాసితి రామా

7. కం. సురలెల్ల నిన్ను వేఁడిన
ధరణిన్ దశరథనరేంద్రతనయుఁ డవయ్యున్
బరమాద్భుతము లొనర్చిన
పరమేశుని నిన్నుఁ బొగడ వశమే రామా

8. కం. అనుజులతోడను దశరథ
జనవిభుసుతుఁడై జనించి జనులు వొగడు స
ద్గుణరత్నాభరణుని నిన్
మనమందున సన్నుతింతు మానక రామా

9. కం. చిరుతగుప్రాయమునను సో
దరయుతుఁడగునట్టి నీవు తలిదంద్రులకున్
మురిపెము ముద్దులఁ జూపుచుఁ
బరమామోదంబుఁ గూర్చుస్వామివి రామా

10. కం. ఇలనెల్ల వేదశాస్త్రము
లలరంగా నభ్యసించి యనుజాత్ములతో
విలసిలు నిను నుతించెద
జలజాయతచారునేత్ర జానకిరామా

11. కం. కుశికాత్మజుతో నడవికి
దశరథు పన్పునను బోయి తాటక యనుర
క్కసినిం దునుమాడిన శ్రీ
దశరధరాజేంద్రపుత్ర దయఁగను రామా

12. కం. గౌతమపత్ని కహల్యకుఁ
బాతకమును బో నడంచి పాషాణంబున్
నాతిగా నొనరించిన
సీతాధిప నీదుసేవఁ జేయుదు రామా

13. కం. ముని కౌశికు యాగంబును
ఘనముగ రక్షింపనెంచి కడుదుష్టాత్ముల్
దనుజుల మారీచాదుల
దునుమాడిన వాఁడ వీవు దురమున రామా

14.కం. ఆనందించి మునీంద్రుఁడు
నానాశశ్త్రాస్త్రములను నలినోదర నీ
కానాఁ డొసంగె విద్యలఁ
దా నెన్నో మంత్రములను దశరథరామా

15. కం. జనకధరానధుఁడు తా
ఘనయాగము నొండొనర్చు కాలములోనన్
ముని నినుఁ గొంపోవుఁడు నా
జనకుడు మన్నించె నిన్ను జనపతి రామా

16. కం. అవలీల శివునివిల్లున్
దివిజులు వినుతింప విఱిచితివి నీ వపు డ
య్యవనీసుతఁ బెండ్లాడిన
యనీశ్వర నిను నితింప నలవియె రామా

17. కం. జానకిసమేతుఁ డయ్యును
నానందముతో నయోధ్యయం దుండిననిన్
మానవనాథాగ్రణి నే
మానసమున నెంతుఁ బ్రోవుమా శ్రీరామా

18. కం. కైకకు వరము లొసంగిన
భూకాంతునియాజ్ఞం బొంది భూమిజ ననుజున్
గైకొని వనుల కరుఁగుసు
శ్లోకుని నినుఁగొల్తు లోకసుందర రామా

19. కం. భరతుఁడు రాజ్యమునకు నిన్
నరుదెమ్మని వేఁడ నీవ యాతనిమాటన్
నిరశించి పురికిఁ బోవక
వరపాదుక లిచ్చి యనుజుఁ బంపితి రామా

20. కం. జాయానుజయుక్తుఁడ వై
పాయక సత్యవ్రతంబు పదునాల్గేడుల్
కాయక్లేశము లోర్చుచుఁ
జేయుదు వనవాస మంటి శ్రీరఘురామా

21. కం. సీతాసౌమిత్రులతోఁ
బ్రీతిని నత్ర్యాశ్రమంబు వేంచేసిననీ
ఖ్యాతినిఁ బొగడె మునీంద్రుం
డతనిసతి కాన్కలిచ్చె నతివకు రామా

22. కం. అలదండకావనములో
ఖలుఁ డైనవిరాధుఁ జంపి కడుదుర్మతి యౌ
నలశూర్పణఖకుఁ గినుకన్
గలిగించితి పరిభవమ్ము కదె శ్రీరామా

23. కం, ఖరదూషణాదుల్ లసురులు
దురమునఁ బదునాల్గువేలఁ దున్మాడితివో
ధరణీశ నీప్రభావము
తరమగునే వినుతిఁజేయ దశరథరామా

24. కం. పంచవటీతీరమున ర
చించితి వొక పర్ణశాల సీతాసతితో
నెంచఁగ లక్ష్మణుతోడ వ
సించితి వచ్చోట నీవు స్ఠిరముగ రామా

25. కం. జానకిసుందరరూపము
దానవనాధుండు వినియు దశకంథరుఁ డా
జానకిని నపహరింపఁగ
మానసమునఁ దలఁచె దుష్టమతియై రామా

26. కం. తనపూర్వమంత్రి మారీ
చునిఁ గని రావణుఁడు పల్కె క్షోణిజఁ దెత్తున్
జనుదెమ్ము సహాయం బన
ననుమానించియును వచ్చె నాతఁడు రామా

27. కం. నీ మహిమ మెఱుగుఁ గావున
దా మోక్షము నొందఁ గోరి తగ నీచేతన్
నామారీచుఁడు వచ్చె మ
హామాయామృగము నయ్యు నప్పుడె రామా

28. కం. కనకపుఁ గురంగమై యా
జనకజఁ గనుఁగొనఁగఁ బర్ణశాలకు ముందా
దనుజుఁడు నాట్య మొనర్చిన
జనకజ తెమ్మనియె దాని జనపతి రామా

29. కం. వైదేహి కోరుకోరిక
మోదంబునఁ దీర్పనెంచి భూమిజ నీకున్
నేఁ దెచ్చి యిత్తు నని నీ
సోదరు నట నిల్పి పోతి సుందర రామా

30. కం. కనకమృగంబును బట్టఁగ
ధనువుం గైకొనియుఁ బోయి దానవమాయన్
గని తక్షణంబులో నా
కనకమృగమునుఁ గూల్చితీవు కదె రఘురామా

31. కం. ఆమారీచాసురుఁడున్
స్వామీ నీస్వరముతోడఁ జయ్యన నఱవన్
భూమిజ విని నీదరికిన్
సౌమిత్రినిఁ బంపెఁ గాదె జనపతిరామా

32. కం. సమయంబును గనిపట్టియు
యమివేషంబును ధరించి యసురేశ్వరుఁ డా
క్షమసుత దరికింజని భి
క్షము వేయు మటంచుఁ గోరె ఖలుఁడై రామా

33. కం. అతఁడు నిక్కపుముని యని
సీతాబ్జానన తలంచి శీఘ్రమె భిక్షం
బాతని కిడు నంతట నా
ఘాతుకుఁడు నిజంబు రూపుఁగైకొనె రామా

34. కం. తనరూపము గాంచియు మూ
ర్చను మునిఁగినధరణిసుతను రథమున నిడియున్
గొనిపోయె గగనవీధిని
దనలంకాపురమునకును దనుజుడు రామా

35. కం. ఆలంకాపురమందున్
బాలామణి నొక్కశింశుపాతరువుకడన్
ఆలోన నుంచి దనుజుఁడు
వేలకువే ల్కావలుంచె వెలందుల రామా

36. కం. అంతట నరణ్యమున నా
కాంతను విడనాడి రాగఁ గని లక్షణు నీ
వెంతేని మందలించియు
నింతి నరయఁ బర్ణశాల కేగితి రామా

37. కం. జనకాత్మజాత నెవ్వఁడొ
దనుజుఁ డపహరించె ననియుఁ దలఁచియు నీ వా
యనుజినితో దక్షిణదిశ
జనియుంటివి దైన్యమునను జానకిరామా

38. కం. ఆమార్గమున జటాయువు
భూమిజకై దనుజుతోడఁ బోరినవానిన్
భూమిఁ బడియున్నవానినిఁ
బ్రేముడిఁ గన్గొంటి వీవ శ్రీరఘురామా

39. కం. ఆతనివలనను నీవా
సీతావృత్తాంత మెల్ల శీఘ్రమ విని నీ
వాతనికి మోక్ష మొసఁగియు
నీతమ్మునిఁ గూడిపోతి నృపవర రామా

40. కం. అలశబరి పరమభక్తిని
ఫలముల నర్పించె నీకు వగఁ దమ్మునితో
ఫలముల భుజించి యామెకుఁ
గలిగించితి వీవు ముక్తిఁ గదె శ్రీరామా

41. కం. సాలము లేడుం గూల్చియుఁ
బోలఁగ దుందుభిశరీరమును దూరముగాఁ
గాలం జిమ్మి యొకమ్మున
వాలిం బడఁగూల్చితీవు పావన రామా

42. కం. ఇనసుతునితోడ సఖ్యముఁ
బొనరించి వాలిని వధియించియును దద్రాజ్యం
బినతనయునకు నొసంగియు
ననువుగఁబాలించితీవ యనఘా రామా

43. కం. హనుమానునిచే సీతా
వనజానన కానవాలుఁ బంపియు నీ వా
జనకాత్మజఁ దెచ్చుటకై
యినజుసహాయంబు గోరి తెంతయు రామా

44. కం. భూమిజ యశోకవనమున
సేమంబున నున్నవార్తఁ జెచ్చెర వినియున్
సౌమిత్రిసమేతుఁడవై
యామోదించితివి కువలయాధిప రామా

45. కం. బలగం బెల్లను గూడుక
జలజాప్తతనూజతోడ శ్వసనజతోడన్
అలఘుడు నీ తమ్మునితో
లలిని బయల్వెడలి తీవు లంకకు రామా

46. కం. ఆవారథిమధ్యంబున
భూవరసేతువునొకండు పొల్పెనలారన్
వేవేగమ నిర్మించితి
దేవా నీమహిమ నాకుఁ దెలియునె రామా

47. కం. శరణుం గోరినవానిని
దురితాత్ముం డగ్రజన్ము దోషాచరునిన్
నిరసించి వచ్చునతనిన్
శర ణిచ్చి విభీషణాఖ్యు సాకవె రామా

48. కం. వానరబలములతోడన్
జానకికై లంకకేగి సంగరమందున్
దానవవీరులఁ దున్మిన
మానవపతి నినుఁ దలంతు మదిలో రామా

49. కం. లంకాపత్తనమున ని
శ్శంకన్ నీసైన్య మల నిశాచరబలమున్
గొంకకఁ చెండాడెడు నే
వంకన్ జయమయ్యె నీకుఁ బ్రభువర రామా

50. కం. ఆహవరంగములో నీ
వాహనుమత్స్కంధ మెక్కి యసురాగ్రణులన్
బాహాబలమున దున్మిన
శ్రీహరిదివ్యావతార సీతారామా

51. కం. బలవంతుఁ డైనవానిని
బలుగాకినిఁ గుంభకర్ణుఁ బవరములో నీ
విలఁ గూల్చి వైచినాఁడవు
జలజోదర నిన్నుఁ బొగడ శక్యమె రామా

52. కం. మాయావి యైనవాని న
మేయబలుం డైనవాని మిగుల దురాత్మున్
నాయింద్రజిత్తు ననిలో
నీయనుజుఁడు సంహరించె నృపవర రామా

53. కం. దశకంధరుఁ డపు డెంతయుఁ
బ్రశస్త మగు నరద మెక్కి ప్రభునీపైనన్
విశిఖంబుల వైవఁగ నా
దశముఖుతోఁ బోరి తీవ దశరథ రామా

54. కం. ధరణిని నిల్చినరఘుభూ
వర నీవును రధియు డైన పంక్తిముఖుండున్
దురమొనరింపఁగఁ గాంచియు
సురపతి తే రంపె నీకు సుందర రామా

55. కం. మాతలిచేతను గడు సం
ప్రీతినిఁ బంపించినట్టి విమలరధంబున్
క్ష్మాతలపతి వపు డెక్కియు
నాతఱి సల్పితివి నీవ యాలము రామా

56. కం. దేవతలెల్లరు నీ వా
రావణుతోఁ బోరు టంబరమున నిలిచియున్
భూవర చేచుచు నిన్నున్
దీవించుచు నుండిరపుడు తెలియగ రామా

57. కం. ఆదిత్యహృదయమంత్రం
బాదరమున నాయగస్త్యుం డపుడు తెలుప నీ
వాదిత్యుని సేవించియు
నాదేవుననుగ్రహం నందితి రామా

58. కం. తనవంశభూషణుఁడ వని
మనమున హర్షించి యంశుమంతుఁడు నీకున్
దననిజదర్శన మొసఁగియు
దనుజేంద్రుని గెల్తు వనియె దశరథ రామా

59. కం. సూర్యానుగ్రహ మొందిన
సూర్యకులాభరణుఁడీవు శూరాగ్రణివై
ధైర్యోత్సాహం బలరఁగ
శౌర్యంబున సంగరమ్ము సల్పితి రామా

60. కం. బ్రహ్మాస్త్రము మంత్రించియు
బ్రహ్మకులజుఁ డైన పంక్తివదనునిపైనన్
బ్రహ్మాదిదివిజ సన్నుత
బ్రహ్మాండం బలర నివు వైచితి రామా

61. కం. నీయస్త్రమహిమవలనన్
మాయావి దశాననుండు మహిపైఁగూలన్
శ్రీయుతుఁ డగునీ కెల్లరుఁ
జేయుదు రభివాద మపుడు సీతారామా

62. కం. సురలెల్ల సంతసించియు
దురితాత్మునిఁ బంక్తిముఖునిఁ దున్మిన నీపై
గురిసిరి పూవులవానను
జరితార్థుఁడ వైననీప్రశంసయె రామా

63. కం. అనిమొన విజయుఁడ వగునిన్
గబుఁగొన నేతెంచి దేవగణ మెల్లను వం
దనముల నొనర్చి స్తోత్రం
బునొనర్చిరి భక్తలోకపూజ్యుఁడ రామా

64. కం. మనుజావతారమై నీ
వనిమిషకార్యంబొనర్ప నవనీస్థలిలో
జనపతిదశరథునింటను
జనియించితి రాముఁ డనఁగ శౌరివి రామా

65. కం. నీవు విభీషణు నప్పుడు
రావణు రాజ్యంబునందు రాజేంద్రునిఁగా
నీ వభిషేకించితివో
దేవా నీదగుప్రతిజ్ఞఁ దీరఁగ రామా

66. కం. అప్పుడు విజయము సీతకుఁ
జెప్పుటకై యాంజనేయుఁ జేరియు నటకున్
జప్పున నీ వంపించిన
నప్పావనగాత్రి హర్షమందెను రామా

67. కం. బవరమున గెలుచునిన్నా
యవనిజ కనుగోఁ దలచి యాజ్ఞను వేడన్
బవమానతనయుఁ డంతట
నవనిజకోరికను దెల్ప నప్పుడె రామా

68. కం. అనుమానించియు నీవున్
మనమందునఁ జింతఁ బొంది మైధిలిఁగొని తె
మ్మని యవ్విభీషణున కా
జ్ఞ నొసంగితి వంతలోన జానకిరామా

69. కం. పరమపతివ్రత యగునా
ధరణీనందనను దెచ్చి దనుజేంద్రుఁడు తాఁ
ద్వరితమే నీకర్పించెను
బరమామోదమున నపుడు ప్రభు శ్రీరామా

70. కం. ఆసమయంబున నీ వా
క్ష్మాసుతఁ గోపమునఁ గాంచి మైధిలి నీపై
నాసను నే విడనాడితి
నో సఖీ నినుఁ బాసి తంటి వో రఘురామా

71. కం. పరకాంతాసక్తుండగు
దురితుఁడు రావణునియింటఁ దోయలి నీవున్
జిరకాలము వసియించితి
చెరుపడె నీశీలమంటి శ్రీరఘురామా

72. కం. నీపలుకులు శ్రవణములకు
భూపుత్రికి ములుకు లయ్యు మూర్చ మునిఁగియున్
క్ష్మాపైనను బడి కొంతకు
నాపావనగాత్రి యిట్టులనె శ్రీరామా

73. కం. నీనామస్మరణముతో
మేనం బ్రాణముల నిల్పి మిహిరకులేంద్రా
నే నసురుఁ గోరుదునె యని
జానకి వచియించె నీకు జగదభిరామా

74. కం. అనల ప్రవేశమొనరిచి
మనమున నున్నట్టిశంక మాన్పెద నని యా
జనకజ నీకును మ్రొక్కియు
ఘనవహ్నిం జొచ్చె నపుడుకనుగొన రామా

75. కం. పావని యగుభూనందన
పావకునిం జొచ్చినంతఁ బరిశుద్ధుండై
పావకుఁడు తెచ్చి సీతా
దేవిని నీకొసఁగె దేవ దేవుడ రామా

76. కం. పాతివ్రత్యంబునఁ బ్ర
ఖ్యాతిం గైకొన్న మహిజ కామిని యగునే
భూతలనథా యని సం
ప్రీతిని వచియించె వహ్ని వేగమ రామా

77. కం. నీతండ్రి దశరథుండును
భూతలమున కరుగుదెంచి పుత్రవరేణ్యా
సీతను గైకొను మనియును
నీతో వచియించెఁ గాదె నృపవర రామా

78. కం. పంకరుహసంభవుండును
శంకరుఁడుబు సర్వసురలు చనుదెంచియు నీ
శంకను నశింపఁ జేసియుఁ
బంకజముఖి నేలు మనియుఁ బల్కిరి రామా

79. కం. జానకిశీల మెఱింగియు
మానవవర యిట్లొనర్చి మహియం దెంతో
జానకికిఁ గీర్తి గూర్చితి
మానితయశుఁడైననీవు మాప్రభు రామా

80. కం. సీతాసతి నూరార్చియుఁ
బ్రీతిని మన్నించి నీవు ప్రియసతి నే నీ
పాతివ్రత్య మెఱింగియె
యీతీఱున జేతునంటి వెంతయు రామా

81. కం. భూమిజను స్వీకరించియు
సౌమిత్రీసహితుం డీవు సమరవిజయుఁడై
యామోద మొందుచుంటివి
కామితమందార నీవు ఘనుడవు రామా

82. కం. అంతటఁ బుష్పకయానము
సంతసమునఁ దెచ్చి యానిశాచరుఁ డొసఁగన్
గాంతానుజులం గూడుక
సంతసమున నెక్కితీవు స్వామివి రామా

83. కం. దనుజులు కపులుం గొల్వఁగ
ననుజునితో సీతతోడ నాయానమునన్
దినకరునిఁ బోలెఁ వెల్గుచు
జనియుంటి వయోధ్య కీవు జానకిరామా

84. కం. సాకేతపురికి జన నీ
వాకౌసల్యాది మాతలందఱఁ గని నీ
రాకం గోరెడుఁదమ్ములఁ
బ్రాకటముగఁ గంచి తీవ రాఘవరామా

85. కం. ఇనవంశాబ్ధి హిమాంశునిఁ
జనకసుతాజీవితేశు సద్గుణనిధినిన్
ఘనరాజ్యమందు నను నీ
యనుజులు పట్టంబుఁ గట్టి రప్పుడె రామా

86. కం. సీతాసమేతువుడవునై
నీతమ్ములతోడఁ గూడి నిజరాజ్యంబున్
గౌతుకమునఁ బాలించుచు
ఖ్యాతిం గాంచితివి నీవు ఘనుడవు రామా

87. కం. జనకాత్మజాహృదీశ్వర
జనులను నీబిడ్డ లట్లు సాఁకుచు రాజ్యం
బును బదివేలేడులు ప్రో
చిననీకు నమస్కరింతు శ్రీరఘురామా

88. కం. కాకుత్థ్సవంశరత్నమ
నీకాళుల ధూళి నయ్యు నిలిచెద నన్నున్
గైకొని పరిపాలింపవె
సాకేతపురాధినాధ జానకిరామా

89. కం. శిఖింతువు దురితాత్ముల
రక్షింతువు శరణుఁ గోరుప్రజ నెల్లర నో
పక్షీంద్రబాహనా నను
రక్షింపఁ దలంపవేల రఘుపతి రామా

90. కం. భువనాధిపుఁడీవనుటకు
భవునిశరాసనము విఱుచుబాహుబలంబే
యవనీశ సాక్షియగు నీ
ప్రవిమలమాహత్మ్య మెన్న వశమే రామా

91. కం. పత్రఫలపుష్పతోయము
లిత్రు మహీజనులు భక్తి నెల్లర నీవున్
మిత్రమయి ప్రోతు దశరథ
పుత్రా నన్నేల నీవు ప్రోవవు రామా

92. కం. శ్రీమంతంబు సనాతన
మై మహిమాన్వితము నయ్యు నవనీసుతతో
నామోదప్రదము భవ
ద్రామాకారంబు నకును బ్రణతులు రామా

93. కం. రా యని పల్కనఘంబులు
బోయెడు వెలుపలకు జిహ్వమూలము గాఁగన్
మాయని పల్కఁ గవాటము
వేయువిధం బనియు నేను వింటిని రామా

94. కం. రామస్మరణములోని మ
హామహిమం బెఱిఁగి యేను నత్యతభక్తిన్
రామాయణమును రచించియు
స్వామీ నీకిచ్చియుంటి జానకిరామా

95. కం. సేతువుఁ గట్టేడువేళను
సీతాధిప యుడుత చిన్నిచేతులతోడన్
బ్రీతిని దెచ్చెను సైకత
మాతఱి సంప్రీతి దాని నరయవె రామా

96. కం. వ్రతముల నుపవాసంబుల
సతతము నీయందు భక్తిసల్పక పోతిన్
క్షితినాధ చంద్ర నన్నే
గతి రక్షించెదవొ నీవు కరుణను రామా

97. కం. ధర్మము లొనర్పఁ జాలను
నర్మిలితో బీదజనుల నారయఁ జాలన్
ధర్మవిచారుఁడ వగునీ
వర్మిలి నన్నేలుమయ్య యచ్యుత రామా

98. కం. దురితములు పెక్కొనర్చితి
నరయఁగ సుకృతం బొనర్పనైతిని నేనో
పరమాత్మ భక్తవత్సల
శరణొందితి నన్ను దయను సాకవె రామా

99. కం. గురువులకు నాదికారణ
గురుఁ డౌదువు వేల్పులెల్లఁ గోరఁగ నీవీ
ధరణిని జన్మించిన శ్రీ
హరివగుదువు నిన్నుఁ బొగడ నలవియె రామా

100. కం. భక్తార్తిహరుఁడ వందురు
భక్తశరణ్యుండ వనియుఁ బల్కుదు రార్యుల్
భక్తిని నిది యొసఁగితి నా
సక్తిం గ్రహియించి నన్ను సాకవె రామా

101. కం. నాతప్పులెల్ల మఱచియు
నోతండ్రీ యిది గ్రహించియును బరమేశా
ప్రీతిని నను రక్షింపవె
సీతాలక్ష్మణసమేత శ్రీరఘురామా

102. కం. నీకంకితమిడి వ్రాసితి
నాకుం గలభక్తితోడ నలినేక్షణ నీ
వీకృతి గైకొని నన్నుం
బ్రాకటముగఁ బ్రోవు భక్తవత్సల రామా

103. కం. సకలజగదంతరాత్ముఁడ
వకలంకుఁడ వైననీపదాంబుజములపై
సకలేశ మనము నుంచెద
బ్రకటితముగఁ బ్రోవుభక్తవత్సల రామా

104. కం. కవిసార్వభౌమపుత్రిక
ను విశాలాక్షియనుపేర నొనరినదానన్
గవితగతియెఱుగఁజేసితి
నవనీశ్వర శతకమందు మచ్యుతరామా

గద్యము

ఇది శ్రీకల్లూరివిశాలాక్షి ప్రణీతము.

శ్రీరామార్పణమస్తు

శ్రీ శ్రీ శ్రీ