లక్ష్మీశతకము - పరవస్తు మునినాథకవి

లక్ష్మీశతకము

                                   పరవస్తు మునినాథకవి

(కందపద్య శతకము)

1. శ్రీమద్వేంకటవల్లభ
కామిని చేటీకృతేంధ్రకామినీ హంసీ
గామిని పక్షికులాధిప
గామిని సకలామరీశిఖామణి లక్ష్మీ

2. న్యాయిని విష్ణుమనస్సం
స్థాయిని భుజగాధిరాజశాయిని శుభసం
థాయని పీతాంబరపరి
థాయని సకలార్థసిద్ధిదాయిని లక్ష్మీ

3. చారుమునీంద్రమనస్సం
చారిణి భక్తసుమనోనుచారిణి వినమ
చ్చారిణి భవనాభినుతా
చారిణి సంతతశుభదవిచారిణి లక్ష్మీ

4. వృజినసమాజవిభంజని
నిజభక్తమనోబ్జరంజనీ నేత్రవిభా
విజితమదఖంజనీ స
ర్వజగద్రవ్యాంజనీ నిరంజని లక్ష్మీ

5. ఘనతరదరిద్ర శాసిని
వనజవనీవాసినీ సువాసిని సకలో
పనిషత్సభావిభాసిని
యనఘుసుధాకుందమందహాసిని లక్ష్మీ


6. కమలాక్షదివ్యమహిషీ
కమలా పద్మ రమా జగజ్జననీ మా
కమలవనీనిలయామృత
కమలనిధి ప్రియకుమారికా శ్రీలక్ష్మీ

7. భువి శ్రీమచ్చేషమఠ ప
రవాస్తు జియ్యరు శిరోగ్రరత్నకృపాపాం
గవిభావితాష్టఘంటా
కవితాద్రవిణాఢ్యుఁడను తగంగా లక్ష్మీ

8. అనుపమకవితారచనా
ఘనప్రవీణుండ మదకుకవిమూర్ధ్నవిలుం
ఠనకుశలహస్తవల్లవుఁ
డను మునినాథభిధానుఁడను శ్రీలక్ష్మీ

9. మందారమంజరీమక
రందఝరీమాధురీధురాభరణవచో
బృందంబుల నీపేరిటఁ
గందంబులు చెప్పువాఁడఁ గైకొను లక్ష్మీ

10. కందంబులు కవి మధురస
కుందంబులు సకలదీనకోకిలచయమా
కందంబులు భక్తజనా
నందంబులు శతకముగ నొనర్తును లక్ష్మీ

11. సరసోక్తి సరణి సుందర
తరశతకందప్రసూనదామక మతిభ
క్తి రచించి సమర్పించెదఁ
గరుణం గైకొనుము సిరులు గ్రాలఁగ లక్ష్మీ

12. ప్రణవాకారిణి విష్ణు
ప్రణయిని ప్రణతప్రజార్తభంజననిపుణీ
ప్రణుతజన మందిరప్రాం
గణవిలసత్పారిజాతకద్రుమ లక్ష్మీ

13. వైమానికమానవతీ
స్తోమార్పిత కల్పవృక్షసుమమాలామో
దామోదిత దివ్యాంగీ
సామాగమగానరసహసన్ముఖి లక్ష్మీ

14. చారుచరణ సారసలా
క్షారససంలక్షితాంబుజాతేక్షణ వ
క్షోరత్ననికేతన మ
థ్యారమ్యస్థలిని నతజనావని లక్ష్మీ

15. మునిరాజరాజవదనా
జనసుమనఃమంకజాతసమదాలిని పా
వనశీలినీ మహాశో
భనశాలిని దీనజాలపాలిని లక్ష్మీ

16. అమృతసఖీ హిమకరబిం
బముఖీ శరణాగతాతిభరణోరుగుణా
భిముఖీ గంధర్వసుధాం
శుముఖీ మృదుమధురగానసుముఖీ లక్ష్మీ

17. సురకమలముఖీ కోమల
కరపల్లవపీడ్యమానకమనీయపదాం
బురుహయుగళీ నిరర్గళ
కరుణారసభరిత కృదయకమలా లక్ష్మీ

18. జలజభవప్రముఖాఖిల
నిలింపలీలావతీమనీకరతలసం
చలితమణిచామరచయా
నిలనటదలకాళిలలితనిటలా లక్ష్మీ

19. విరజాతరంగిణీక
ర్బురమయసైకతవితానముద్రితచరణాం
బురుహ రథాంకుశహలక
ల్పరథంగదరాబ్జవజ్రలాంచని లక్ష్మీ

20.లలితాబ్ధ్యంతరిలామ
ధ్యలసద్వనకుసుమరసఝరావర్ధితక
ల్పలతావితానకలితో
జ్జ్వలచింతారత్నపీఠవాసిని లక్ష్మీ

21. స్వారాట్పముఖాఖిలబృం
దారకబృందోరుమౌళితటమానిక్య
స్ఫరకిరణ దీపావళి
నీరాజనరాజితాంఘ్రినీరజ లక్ష్మీ

22. ఘనమాన్యవళక్షాంబర
మణినాదసభానిశాంతమకుటాదికమం
డనగోదంతావళవా
హనలీలోద్యానవనవిహారిణి లక్ష్మీ

23. ఇందీవరమిత్రసుధా
స్యందనకౌస్తుభదిగంతసామజసామ్రా
ణ్మందారపుష్పవాటీ
బృందారకధేనుసోదరీమణి లక్ష్మీ

24. శతమఖముఖనిఖిలహరి
త్పతిశతపత్రాననావితానకరసమ
ర్పితచంద్రశకలపేటీ
ధృతరత్న సువర్ణమయకిరీటీ లక్ష్మీ

25. మధుకైటభవైరిప్రియ
మధురాధర విలసమానమానాతీత
ప్రథితాసమానవైభవ
సుధామధురవాక్తరంగశోభిని లక్ష్మీ

26. పరమపదావాసిని సో
మరసాస్వాదనవిలోలమంజుల హేమాం
బరశోభిని భక్తప్రియ
వరదాయని దాంతిబ్రహ్మవాదిని లక్ష్మీ

27. భూరమణమకుటతటశో
భారత్నమరీచిజాలబాలాతపసు
స్మేరపదాంబుజ భువనా
థరామనీ శంఖచక్రథారిణి లక్ష్మీ

28. లలితనిజపీఠపార్శ్వ
స్థలసంస్థితవాగ్గిరీంద్రజారతిహస్తో
జ్జ్వలవీటికాకరండక
కళాచికారత్నపాదుకాయుగ లక్ష్మీ

29. నిరుపమనిర్మల ఖేలిని
పరమేశ్వరి యాదిదేవి భక్తజనాళీ
పరతంత్రదివ్యసుమన
స్సరసీరుహపరమపురుషసహచరి లక్ష్మీ

30. ఆపత్సఖిశుభకరిస
ర్వోపద్రవవారిణీ శుభోజ్జ్వలభక్తా
ళీ పారిజాతత్రిభువన
దీపాకురమంగళాదిదేవత లక్ష్మీ

31. నృపదృక్కమలావాసిని
నృపసింహాసననివాసినీ సకలమహా
నృపపాలినీ సుదుర్మద
నృపసంఘాతోగ్రశాసిని శ్రీలక్ష్మీ

32. యతిహృత్పంకజమధుకరి
పతగాధిపగమని పతితపావనిపరిర
క్షితనిర్జరి జగదుదయ
స్థితిసంహృతికరి యనంతధీనిధి లక్ష్మీ

33. దిగిభవితానానీతం
బగుచల్లనినీటతేట నభిషేకం బా
డుగరితతలమానికమా
భగవతి లావణ్యవతి ప్రభావతి లక్ష్మీ

34. పెనుపడగదారికవణం
బును దినెడివయాళి వార్యముపయిం బలుప్రా
మినుకుంగొనవీధులఁ బెం
పున వాహ్యాళిం జరించు ముద్దియ లక్ష్మీ

35. నలువ నెలతాల్పు మెదలుం
గలవేలుపుతలిరుబోండ్లగములు ననుంగుం
జెలికత్తియలై కొలువం
జెలువారు త్రిలోకజనని శ్రీకరి లక్ష్మీ

36. నళినాక్షునురఃపీఠిం
గొలువై కచ్చపముకుందకుందాదినిధుల్
గొలువ జగంబుల నెనరుం
దలిర్ప రక్షించు భువననాయకి లక్ష్మీ

37. వినయము శాంతియు సత్యం
బును క్షమయును ధృతియు దానమును శ్రద్ధతపం
బును నీతియు ధర్మంబును
నను నిక్కల నాట్యమాడు నన్నువ లక్ష్మీ

38. పలుకుఁజెలి మరుగరిత ప
జ్జలఁ గోడఱికము లొనర్పఁ జక్రధరుఁడు మో
సలఁ గార్యభరము దీర్పఁగఁ
నెలమి జగంబుల భరించు నీశ్వరి లక్ష్మీ

39. త్వదనుగ్రహపాత్రుండు జ
గదభినుతుం డధికభోగి ఘనయశూఁడు మనీ
సదనచరుండు ప్రబుద్ధియు
సదయుఁడు నృపమకుటఘటితచరణుఁడు లక్ష్మీ

40. కమలాలయ త్వద్భ్రూవి
భ్రమఖేదం బీశదాసవైషమ్యము లో
లము నిమ్నోన్నతము నొన
ర్చు మహాశ్చర్యము తలంచి చూడఁగ లక్ష్మీ

41. నీనెనరు గొనం బింతని
జానుగఁ గొనియాడఁ దరమె చతురానన పం
చానన షడానన సహ
స్రాననులకు బహుఘృణాగుణాకరి లక్ష్మీ

42. వరదాయని సుఖకరి యిం
దిర శ్రీకరి మంగళాధిదేవత యఖిలే
శ్వరి భక్తావని జలధీ
శ్వరి కన్య యనంగ నీకు సంజ్ఞలు లక్ష్మీ

43. నీవు గలచోటు సరసము
నీవును లేనట్టిచోటు నీరసము జగ
త్పావని సరిలసదనుకం
పావని రదవసనజితజపావని లక్ష్మీ

44. కలుములపైదలి బలులే
ములసిలుగులు బాపుతల్లి ముజ్జగములఁ బెం
పలరన్ బ్రోచు యువతి త
మ్ముల నిమ్ముల నాడు ముద్దుముద్దియ లక్ష్మీ

45. భవదనుకంపకు విను వెలి
యవువాఁడు జనావమతుఁడు నపయశూఁ డబలుం
డవినీతి కుమతి దారి
ద్ర్యవశుం డతిమూర్ఖుఁడును దురాశుఁడు లక్ష్మీ

46. కొమరార నీవు కలిమి క
లిమి కమలా నీవు లేమి లేమి ధరిత్రిన్
గమనీయకపోలముకుర
సముంచితమురారివదనసారస లక్ష్మీ

47. అకటకట యరుదు నీకత
యొకని ధనాశుఁ జేసి యొకనిఁ జెఱిచి వే
ఱొకని మురిపించి యిట్టులఁ
దకతక లాడింతు జగము తడఁబడ లక్ష్మీ

48. హారమకుటకుండలకే
యూరాదిసమస్తభూషణోజ్జ్వలదివ్యా
కారిణి దారిద్ర్యప్రవి
దారిణి నిను దలఁచువారు ధన్యులు లక్ష్మీ

49. గురుభక్తిరతులు పరధన
పరదారపరాజ్ఞ్ముఖులు సుభాషణులు ధరా
సురహితులు దానశీలురు
సరసాత్ములు త్వత్కృపార్హజనములు లక్ష్మీ

50. వెలితమ్మిగద్దెఁ గొలువై
జలజభవాద్యమరవరులు స్వనిటలఘటితాం
జలు లై కడు సేవింపఁగ
నెలమి జగం బేలు త్రిభువనేశ్వరి లక్ష్మీ

51. బలి బిచ్చ మిడక ధర్మ మె
డలి కామక్రోధముల నడరి పరుషపువా
క్కులఁ గ్రూరు లగుచు గర్వము
గలవారలు మీకు మెప్పుగా రిల లక్ష్మీ

52. పండితుఁ డాతఁడు శ్లా
ఘ్యుండతఁడు కులీనుఁడతఁడు గుణియాతఁడు శూ
రుం డాతడు ధన్యుం డె
వ్వండు భవత్కరుణ గల్గువాఁ డిల లక్ష్మీ

53. రమ! యెవనిమొగముపై నీ
బొమగదలునొ వాఁడు రత్నముకుటుఁడయిగజేం
ద్రమునెక్కి ముత్తియపు గొడు
గమర నమ న్నృపులఁ జూడ కరుగును లక్ష్మీ

54. సుమశరుతల్లీ సుగుణౌ
ఘమతల్లి ప్రార్థితార్థకల్పవల్లీ
యమరుజగంబులతల్లీ
విమలకృపారసపుపాలవెల్లీ లక్ష్మీ

55. సరససుమచందనాది సు
పరిమళవస్తుతతియందు భాసిలి యవియున్
ధరియించు ఘనులసంప
భరితులఁ గావించు పరమపావని లక్ష్మీ

56. శనిముఖు లష్టమగతి కె
క్కినవిధి కష్టదశ నొసట గీసిన నీప్రా
పునఁగల నరు నే మొనరుతు
రినపుషితాంబుజము దుహీన మేచునే లక్ష్మీ

57. శ్రీయును భూమియు లక్ష్మియు
నా యభిదానంబులం దనర్చియు భక్త
శ్రేయోదాయిని వగు నిను
బాయక మదిలోఁ దలంతు భక్తిని లక్ష్మీ

58. తలతొడవుగా ధరింతును
హలకులిశాంకుశకుశేశయాదియాదిశుభాంకో
జ్జ్వల మగు త్వత్పదకమలయు
గళ మస్మద్రక్షకై తగంగా లక్ష్మీ

59. విను దిగ దచ్చిరువార్వెయి
కనులయొడయు లెట్టికన్నుఁగవ గోరుదు రా
వనజదళరుచిదళిత మై
పొనరెడి నీకన్నుగవకు మ్రొక్కుదు లక్ష్మీ

60. వినఁ గనఁగ విచిత్రము నీ
నెనరుం గలచూడ్కి యెవ్వనిపయిఁ బొలుచువాఁ
డు నరేంద్ర మకుటవిఘటిత
ఘనమణిఘృణిమండితాంఘ్రికమలుఁడు లక్ష్మీ

61. సిరి నీకు జోహారు పయ
శ్శరధిసుతా నీకు జోత సకలజగదధీ
శ్వరి నీకు మ్రొక్కు కనకాం
బురుహవాసిని నీకు గేలుమోడుపు లక్ష్మీ

62. నరుఁడు నరపాలకుఁడు నీ
కరుణాపాంగములగములఁ గాఁడే యా నీ
కరుణారసముగదా రా
జ్యరమాకలితాభిషేకసలిలము లక్ష్మీ

63. నీపాలఁ బడితి భక్తా
ళీపాలిని ఘనకృపాలలితశుభదృష్టిన్
మాపాల గలిగి బ్రోవుము
భూపాలార్పితమణీభూషణీ లక్ష్మీ

64. నానూతననిక్షేపమ
నానోఁచిన నోముపంట నాభాగ్యమ నా
యానందజలనిధీ నా
మానితమందారకక్షమాజమ లక్ష్మీ

65. ననుఁ గన్నతల్లి నన్నే
లిన దైవమ నాతపోలలితఫలమాన
న్మనుచు పదార్వన్నెయమల
నను నెనరునఁ బ్రోచు కలిమి నవలా లక్ష్మీ

66. నీ వని నమ్మితిఁ ద్రిజగ
త్పావని విను నీవినా యితఃపర మెఱుఁగన్
రావే లోకైకేశ్వరి
కావవె భద్రాత్మికా సుఖప్రద లక్ష్మీ

67. నినుఁదప్ప వెఱె యన్యులఁ
గొనియాడఁగఁ బోను జనని గొనకొనియుం బ్రో
చిన నీవె బ్రోవక యుం
డిన నీవె విను త్రిలోకనాయిక లక్ష్మీ

68. ఓకమలపాణి యోభువ
నైకజనని యోనమద్గుఋహాంగణదివిజా
నోకహ! రావే కృపఁగన
వే కడునార్తు నను బ్రోవవే వెస లక్ష్మీ

69. ఘోరదరిద్రసముద్రవి
హారమహాబాడబానలాలింగనమున్
జారుకటాక్షసుధారస
పూరంబుల నార్చి నన్నుఁబ్రోవుము లక్ష్మీ

70. ఇమ్మా మదభీష్టంబులు
కొమ్మా మా మ్రొక్కులన్ ముకుందుననుంగుం
గొమ్మా వినవమ్మా మా
యమ్మా వలరాజు గన్నయమ్మా లక్ష్మీ

71. నిరతము యుష్మచ్చరణాం
బురుహద్వయచింతనాప్రమోదాత్ముఁడ నై
కర మలరారు ననుం గని
గురుకృప రక్షణము సేయఁగూడదె లక్ష్మీ

72. విను మెన్నికష్టములు బె
ట్టినఁ బడి యోర్చితి నెదం గడిందిధృతి బెం
పున రక్షింప మనంబున
నెనరించుక కలుగ దకట నీ కిఁక లక్ష్మీ

73. విను మెటులఁ దప్పదు సుమీ
ఘనసంపదలిచ్చి ననుఁ గావక నీ వెం
దును భక్తజనంబులకుం
గనుఁగొన ముంగొంగుపసిఁడి గావే లక్ష్మీ

74. పరిభవపరిచితి మిక్కిలి
దురవస్థం బెట్టి తార్తి దొరయించితి వ
చ్చెరు వే నృయపరాధం
బురక యొనర్చితి వచింపు మున్నతి లక్ష్మీ

75. చేసితి చేయంగలపనిఁ
బోసితి పరిభవపుధారఁ బొలియించితి వా
యాసంబుల నిఁకనైన మ
హా సంపదలిచ్చి కావుమా వెస లక్ష్మీ

76. కనికరపుఁగడలివైనను
ఘనసంపద లిచ్చి యిపుడు కావుమి యటులై
నను నీలసత్కథావళి
గను విద్వత్సభలలోఁ బ్రకాశము లక్ష్మీ

77. వింటిఁ ద్వదంచితచరితం
బంటి ననుం గరుణఁ బ్రోవు మని నిను నెడఁదం
గంటి భవత్కారుణ్యముఁ
గంటి నిధానంబుఁ గంట గాదే లక్ష్మీ

78. నొచ్చితి నవమతి నచ్చితి
పెచ్చు గదిరె నిచ్చఁ గచ్చువిచ్చైతి కటా
నచ్చి నిను జొచ్చి వచ్చితిఁ
గ్రచ్చర నిప్పచ్చరంబు వ్రచ్చుము లక్ష్మీ

79. కడుకష్టపెట్టి తిటు లె
క్కుడు గాసిలఁజేసి తొప్పుఁ గుందించితి వా
రడి యింకనైన దీరిచి
గడలుకొనం బ్రోవరాదె గ్రక్కున లక్ష్మీ

80.నను గృపఁ జూడుము దుస్థ్సితు
లను దొలఁగింపుము శుభోజ్జ్వలశ్రీయుతుగా
నొనరింపుము భవదాశ్రిత
జను లాపద్రహితు లనవె చదువులు లక్ష్మీ

81. నీచూపు లెచటి కేఁగునొ
యాచోటికి నరుగు గలుము లహమహమని నిన్
యాచించుఁ గాదె నాదెస
నాచూపులఁ గను మొకించుకంతయు లక్ష్మీ

82. నను గావు నను ధరింపుము
నను సత్కృప రక్షసేయు నను నేలుము వే
నను గలుము లొసఁగి ప్రోవుము
నను మన్నింపుమి యెడంద నమ్మితి లక్ష్మీ

83. నిను వేఁడుదు నినుఁ బొగడుదు
నిను గొలుతు నినుం దలంతు నిను వర్ణింతున్
నిను సంప్రార్థింతు నినున్
వినుతింతున్ గోర్కులొసఁగు వేగమె లక్ష్మీ

84. విను తడవేల యొనర్చెదు
పెనుజిక్కులఁ జక్కఁజేసి పెనుపుము సిరులన్
దనివోవ నెనరుచూడ్కుల
నను గనుఁగొని భక్తజనమనఃప్రియ లక్ష్మీ

85. మదిఁదలఁచి యర్చనము లి
చ్చెద మ్రొక్కెదఁ గిర్తనంబుఁ జేసెద నిదె నీ
కొదవించు నన్నివిధులు శు
భదములు గావే త్రిలోకపావని లక్ష్మీ

86. సరసిరుహనివాసిని శుభ
కరిపంకజహస్తపద్మగంధిని భూతే
శ్వరి పద్మిని దరిత్రిభువన సుం
దరి నిన్నుఁ దలంతు లోకనాయిక లక్ష్మీ

87. అమృతమయాత్మిక సకలా
గమసన్నుత సుప్రసన్నకాంతప్రసాదా
భిముఖి నతార్తివినాశని
కమలా నిను గొల్తు గరుడగామిని లక్ష్మీ

88. ధనధాన్యకరి శుభంకరి
వినమజ్జనసురసురభి ప్రవిమలాత్మకచం
దనశీతలత్రిభువనవ
ర్ధనిదేవి భజింతు నిన్ను దారణి లక్ష్మీ

89. సతతానందమయాత్మిక
శ్రుతిమౌళిమణిప్రభావిశోభిత శరణో
చతురాననాదిసేవిత
చతుర్భుజ దలంతు నిను యశస్విని లక్ష్మీ

90. లలితాత్మిక భాస్కరి ని
ర్మలిని హిరణ్మయి సుపర్వమహిళాకర సం
చలచామరమరుదంకుర
చలితాలక యెంతు నిను రసాసఖి లక్ష్మీ

91. శివ శివకరి యవిభూతి
ప్రవిమర్ధని పద్మనిలయ పద్మిని పద్మో
ద్భవ పద్మప్రియ పద్మిన్
ధ్రువఁ గొలుతు నినున్ సువర్ణరూపిణి లక్ష్మీ

92. త్రైలోక్యకుటుంబిని ప
ద్మాలయ పద్మమకరాదికానేకనిధీ
వ్యాలీఢపురస్థ్సలి నత
పాలిని వినుతింతు నిను విభావరి లక్ష్మీ

93. స్థితి సిద్ధి సరస్వతి రతి
ధృతి బుద్ధిం బ్రకృతి దితి నదితి మంగలదే
వత నమృతసుమతి దివ్యా
కృతి నిను గీర్తింతుఁ జిదచిదీశ్వరి లక్ష్మీ

94. అనఘు వసుంధర వసుధా
యిని తేజస్విని మహేశ్వరేశ్వరి శుభహ
స్తిని నాథసంప్రభోధిని
ధనవాసిని దలఁతు నిను సుధాసఖి లక్ష్మీ

95. శోకవినాశని సుఖద శు
భాకారిణి పద్మ త్రిజగదవనిహిరణ్య
ప్రాకారవినమదమరా
నోకహ నినుఁగొల్తు హరి మనోహరి లక్ష్మీ

96. విశ్వజనయిత్రి శాశ్వత
శశ్వత్సంపత్ప్రదన్ బ్రశాంతి నఖిలలో
కేశ్వరి భక్తజనప్రియ
విశ్వాత్మిక దలఁతు నినుఁబ్రమలివిని లక్ష్మీ

97. సత్యాత్మిక వసుథారిణి
నిత్యానందస్వరూపిణిం ధాత్రి శతా
దిత్యప్రభ శుచి నభవా
దిత్యప్రణుతాంఘ్రి నిను నుతింతును లక్ష్మీ

98. శతకోటిచంద్రశీతల
జతురానన మీనకేతుజనని విభూతిన్
సతి పద్మమాలికాధర
నతపోషణి గొలుతు నిను ధనప్రద లక్ష్మీ

99. దారిద్ర్యప్రవిదారిణి
నీరేజవనీవిహారిణిన్ బరమశుభా
కారిణి నతపరిభసం
హారిణి నిను దలఁతుఁ గృతివిహారిణి లక్ష్మీ

100. నారాయణి దుష్కృతసం
కారిణి నభయప్రదానహస్తాబ్జపయః
పారావారకుమారి ఘృ
ణారాశి తలంతు నిను సనాతని లక్ష్మీ

101. జయజయ దరిద్రమర్ధని
జయజయ భక్తార్తిశమని జయజయ దేవీ
జయజయ మునికవివరనుత
జయజయ నిజభక్తశుభద జయజయ లక్ష్మీ

102. అలరుం గైతలనేరుపు
గలుగంగా నిన్నుఁబొగడఁ గాంచితిఁ దలఁపన్
దొలిబాముల నోఁచిన నో
ములపంట ఫలించె సిరులఁ బొదలితి లక్ష్మీ

మ. అనఘు శ్రీపరవస్తు శేషమఠపీ
ఠాధీశజియ్యర్మహేం
ద్రనిరాఘాటకృపాకటాక్షరససం
ప్రాప్తాష్టఘంటాకవి
త్వనిధి శ్రీ శతపత్రసన్మఠముని
స్వామిప్రణితంబు ధా
త్రిని లక్ష్మీశతకంబు భానుశశిభూ
భృత్తారమై శోభిలున్

సమాప్తం