నరసింహశతకము - రచయిత తెలియదు

నరసింహశతకము

                                  రచయిత తెలియదు

1. శ్రీ మానినీవిమలహృ
త్తామరస దివాకరా సుదర్శనహస్త
శ్రీమంగళశైలాధిప
ధామా నరసింహనామ దైవలలామా

2. అంబుధిశయనా! మునిహృద
యాంబుజసంచార! ఫణికులాధిపశయనా
కంబుగ్రీవార్చిత పా
దాంబుజయుగ! శౌరి! మంగళాద్రినృసింహా

3. కుంభీంద్రపాలకా! హరి
కుంభినిపరిపాలకా! యకుంఠితతేజా!
జంభారివినుత! ఘనకరు
ణాంభోనిధి! దేవ! మంగళాద్రినృసింహా

4. ధర్మము నిలుప జనించితి
వర్మిలియుగయుగమునందు నయముగనిపుడున్
ధర్మము నిలుప జనింపుము
శర్మదుఁడవు మంగళాద్రి జయనరసింహా

5. రోగంబులు క్షామము భూ
భాగంబునఁ ప్రబలె మాయభాగ్యము సమ్య
క్త్యాగవిహీనులు ప్రబలిరి
యాగమనుత మంగళాద్రి యనఘనృసింహా

6. అజ్ఞానిని నినుదెలియఁగ
ప్రజ్ఞాహీననుగదయ్య పాలింపుమినన్
సుజ్ఞానహృదయవాసా
యజ్ఞానము బాపి మంగళాద్రినృసింహా

7. నిగమములు బలుకఁజాలవు
నగజాపతినిన్నుఁ దెలియడటసేవింపన్
జగదీశ్వర! సర్వాత్మక!
అగణితదయనేలు మంగళాద్రినృసింహా

8. యోగవిధ్యానవిహీనులు
భోగపరాయణులుధాత్రి బొడమిరి స్వార్ధ
త్యాహులఁజేయుమి యందఱ
నాగడములు వాపి మంగళాద్రినృసింహా

9. ధ్యానము మౌనమునాత్మ
జ్ఞానమునెఱుఁగంగలేని కలుషాత్ములు నీ
మానవులగుచుండిరయో
మానుపవే దుర్గుణములు మాన్యనృసింహా

10. ఘనరోగపీడితులు మఱి
ధనలోభులు క్రోధమతులు దంభాకారుల్
గుణహీనులైరినరులిదె
ఘనమతులను జేసిప్రోవు ఘననరసింహా

11. భుక్తియురక్తియు యుక్తియు
ముక్తియు భక్తియును శక్తి మొదలెఱుఁగమయో
ముక్తిప్రదుగన మాత్మసు
శక్తి నొసఁగు మంగళాద్రి జయనరసింహా

12. అథముఁడును ధర్మమెఱుఁగని
యధికారికి సేవచేయుటన్నంబునకై
యధమత్వముగాదే ఘన
పథకమెఱుఁగక మంగళాద్రి భవ్యనృసింహా

13. సేవింపనేటికే తమ
జీవితంగడుపనీచు చిత్తులమది స
ద్భావమున నాత్మశక్తిని
సేవింపఁగరాదె నిన్ను శ్రీనరసింహా

14. సాకారుఁడన్ననేమి ని
రాకారుండన్ననేమి యఖిలాంతరధ
ర్మైకరతుల్ న్యాయమతుల్
బ్రాకటగుణధనులకెన్న భవ్యనృసింహా

15. ధర్మంబె నీస్వరూపము
ధర్మమయుడవీవుసకల ధర్మరతులె నీ
మర్మమెఱుంగగనేర్తురు
ధర్మవిహీనులకు నీకు దవ్వునృసింహా

16. ఏవిధినిన్నెఱుఁగందగు
నేవిధిధర్మంబునిలుచు నెవ్వేళలమా
కేవిధికర్తవ్యమె నీ
వావిధిబోధించు మంగళాద్రినృసింహా

17. ఎవ@డు ప్రజోన్నతికైధర
ప్రవిమలమతినేలునతని పావనయశమే
రవళించునెల్లదిక్కుల
కవివాగ్లక్ష్యంబుచేవె ఘననరసింహా

18. ధర్మమెఱుంగని చదువును
ధర్మములేనట్టి తెలివి ధనమునుబ్రదుకుం
కర్మములు వ్యర్ధములుగద
దర్మమె నీతేజమంచు దలఁతునృసింహా

19. ఏతీరునభావించిన
నాతీరునదోఁపుచుచుందు వమలాత్ములకున్
భూతదయోన్నతమతులకు
భూతమయాసర్వమీవె ప్రోలనృసింహా

20. దయనరునకు తొడవెయ్యెడ
దయయేనీరూపమంచు దలచెదనేనా
దయలేనివాడు శాత్రువు
జయముంగాంచంగలేడు జయనరసింహా

21. ధనలోభమతికి దయయును
వినయముత్యాగంబు స్నేహవిభవంబునునె
మ్మనమునకెక్కవు ధనమే
ఘనమాసద్గుణముఘనము ఘననరసింహా

22. పరహితమతికవ్వేళను
గురుతింపగహేతువేల కూరిమిచూపం
బరహింసాసక్తునకును
గురుకారణమేలచెఱుపగోరునృసింహా

23. అర్థప్రియులౌచును స
ర్వార్థప్రదునిన్ను దెలియ రజ్ఞులుభో
గార్ధములును గడపటిపురు
షార్ధముబోలెనని యార్యులండ్రునృసింహా

24. శాంతాత్ములు నీభక్తులు
శాంతాట్ములె నిన్నెఱుంగజాలుదు రెదలో
శాంతవిహీనులకునునీ
కెంతోదూరంబు జగదాధీశనృసింహా

25. శాంతవిహీనుండా దివి
జాంతకుఁడెఱుఁగంగ జాలె నానిన్నుమహా
శాంతుడు ప్రహ్లాదుఁడుబహి
రంతరములనిన్నెచూచెనయ్యనృసింహా

26. శాంతంబె ముక్తినిచ్చును
శాంతవిహీనునకును నాత్మసౌఖ్యముగలదా
శాంతమె గౌరవమొసఁగును
శాంతునకగు నిత్యసంతసంబునృసింహా

27. నిర్మలము నిరుపమానము
ధర్మమయము నీచరితము దలచెద నాదు
ష్కర్మములు ద్రోసిబ్రోవలె
కల్మషహర మంగళాద్రి ఘననరసింహా

28. మిత్రంబులు సుజనులకు ప
విత్రంబులునఘలతలవిత్రంబులుస
త్పాత్రములు పొగడనీదుచ
రిత్రంబులు మంగళాద్రి శ్రీనరసింహా

29. భూరిభయవిదారణములు
కారణములు మోక్షరాజ్యగరిమకు నీస
చ్చారిత్రవర్ణనలుభవ
హారివిగదె నీవుమంగళాద్రినృసింహా

30. అరివర్గహారివని నిను
బరిపరివిధములభక్తి భావించిమదిం
దిరముగనమ్మితి కూరిమి
నరయగదే నిన్ను మంగళాద్రినృసింహా

31. కల్యాణదాయివని వై
కల్యములేకుండగొలుతు గదవేమాకుం
గల్యాణము లొసగుము సా
కల్యముగా మంగళాద్రి ఘననరసింహా

32. మంగళగిరినిలయా నీ
మంగళతరమహితగుణసమాజంబెన్న
న్మంగళము లొసఁగునెపుడు శు
భాంగామమ్మేలు మంగళాద్రినృసింహా

33. ఎవ్వఁడునినుమదినమ్మునొ
యెవ్వనిరక్షింపనీవు నెంతువొ వాని
నెవ్వగలఁగుందజేతువు
నవ్వులకేయేమొగాని నవ్యనృసింహా

34. అపనిందలనొందింతువు
నపరాధియటంచుమనుజులనఁ జేతువు నీ
చపుదశ నొందింతువు నీ
కృపచూపవు గాదెమొదట శ్రీనరసింహా

35. అప్పటికిని నిశ్చలమతి
దప్పక నిన్నాత్మనెంచు ధర్మాత్ముని నీ
వెప్పటికిని రక్షింతువు
చెప్పితినే నిదినిజంబు శ్రీనరసింహా

36. పలుక నశక్యంబగు మది
దలఁచిన కొలఁదినివిచిత్ర తరమగు నీలీ
లలు నిట్టివనినుతింపఁగ
నలవియకో యెవరికైన ననఘనృసింహా

37. ముక్తి సతీమణిమౌళిని
ముక్తామణులగు నీపదములు పొగడఁగ న
వ్యక్తను నే నేరఁజుమీ
శక్తిత్రయమూర్తివీవు జయనరసింహా

38. పొంతనములు ముక్తికిశ్రుతి
కాంతా సీమంతవీధి ఘనభూషలు పా
దాంతమహితదీధితులా
ద్యంతస్థితిరహిత మంగళాద్రినృసింహా

39. ఏతేజమనలశశిఖ
ద్యోతాదులయందు వెలుఁగునో భూతౌఘం
బేతేజముచే నలరెడి
నాతేజెమెగొలుతు మంగళాద్రినృసింహా

40. శ్రీకరము నఖిలశత్రుని
రాకరమును మహితకీర్తికారకమును సౌ
ఖ్యాకరమగు కల్యాణగు
ణాకర నీసేవ మంగళాద్రినృసింహా

41. బాలుఁడు ప్రహ్లాదునిలో
నాలోచింపంగఁబెద్ద యగు నారదులో
చాలవెలుఁగు నీతేజమె
లలితగుణజాల నేదఁలంతు నృసింహా

42. చారుతరమంగళాద్రి ఘ
నారామమనిహారకౌతుకాయుత్తమతీ!
సూరిజనహృదయ పద్మవి
హారా! రవితేజ! మంగళాద్రినృసింహా

43. మంగళతర మంగళగిరి
శృంగాగ్రవిహార నారసింహాకారా
సంగరహితమునిమానస
రంగన్మణిపీఠవాస రమ్య నృసింహా

44. సామాదిగానలోల ని
రామయుఁడవు భూతమయుఁడ వమలుఁడ వనుచుం
బ్రేమంబున నుతిచేతును
కామితఫలదాతవీవు ఘననరసింహా

45. సారసదళలోచన నీ
చారుపదాంబుజయుగంబు సద్భక్తిని హృ
త్సారసమునఁ గొల్చెదభవ
తారకమని మంగళాద్రిధామనృసింహా

46. ఆద్యమ నిర్వచనీయము
హృద్యము నిర్వధిక మనుపమేయము శ్రుతిసం
వేద్యంబునీదు చరితం
బాద్యంత విహీన మంగలాద్రినృసింహా

47. ప్రజ్ఞానులు నిశ్చలది
వ్యజ్ఞానులునైనఁ దెలియఁగానేరరు నే
నజ్ఞాని నెఱుగనేర్తునె
ప్రజ్ఞానమయస్వరూప భవ్యనృసింహా

48. నిరవధివై నిర్విధివై
నిరంజన నిరామయతను నెఱివెల్గెడి ని
న్నరసి తెలియంగఁగలరే
హరసురవిధులైన మంగళాద్రినృసింహా

49. నిను సగుణుఁడు సాకరుం
డనినను నిర్గుణుఁడు మఱి నిరాకారుండే
యనినను యెటులెన్నిన నా
మనమున నానందమొదవు మాన్యనేసింహా

50. వేదండవరద బాయక
నీదిపదాబ్జములు గొలుతు నిశ్చలమతిన్
నీదరిజేరితి నన్ను ఘ
నాదరమునఁబ్రోవు మంగళాద్రినృసింహా

51. నానాథుని సఫలీకృత
మనోరథునిఁజేసిప్రోవుమా దయతోడన్
నీనామమె దలఁచెద నీ
యానసుమీ మంగళాద్రి యమలనృసింహా

52. నమ్మితి నీపదయుగళము
నెమ్మదిని నిరంతరంబు నిండినభక్తిన్
నమ్మినఁ బ్రోచుటనీకును
సొమ్ముగదే మంగళాద్రి శుభనరసింహా

53. భూషింపనేరఁ బెక్కులు
శేషశయన! నిన్నుమదిని సేవింతు మముం
బోషింపు మార్తరక్షక
భూషణముదిగాదె నీకుఁ బుణ్యనృసింహా

54. నీపదము లెన్నువారల
నాపదలనుబాపి సుఖములందింపంగా
తాపత్రాయాబ్ధి గడుపఁగ
నీపనిగదె మంగళాద్రి నిలయనృసింహా

55. తెలిసియుఁ దెలియక తప్పులు
పలికినచో దేవ! మదిని బాటింపక ని
శ్చల భక్తినొసఁగి ప్రోవుము
అలఘు దయానిలయ మంగళాద్రినృసింహా

56. సతులకు పతియందు బ్రియో
న్నతి భూతదయారతియును నయ విద్యాసం
తత ధైర్యమతియు సజ్జన
హితమతియు నొసంగిప్రోవు మీశనృసింహా

57. మానవతులపై మది నను
మానమసూయయును బూని మాత్సర్యమతు
ల్మాన కపనిందమోపుట
యేనాఁడును గలదుచూవె యీశ! నృసింహా

58. ఇది నిజమా కాదా యని
మదిలోఁజర్చింపకొరుల మదిఁగలఁగం బె
ట్టిదముగఁ బలుకుటె యెప్పుడు
ముదమగు దుష్టులకు విమలమూర్తినృసింహా

59. సోదరభావోన్నతి మరి
యాదవిహీనులకుఁ దెలియదకటా! కాలో
న్మాదంబటంచు నితరుల
కాదని తిట్టుటయె తెలియుఁగాని నృసింహా

60. తరుణులఁ జుల్కదనంబుగ
నరయక నెవ్వేళగౌరవార్హలటంచుం
గరము దలంపగఁజేయుము
పురుషుల నెమ్మనములందు బుణ్యనృసింహా

61. తనబాహుకలిమి దైవం
బునుసత్యమునమ్మి ద్రోహమునుజేయక నె
మ్మనమున సుఖమొందగఁనీ
జనులకు బోధింపుమీవు జయనరసింహా

62. తలితండ్రులకును బిడ్డల
కిలను సహోదరులకైన నెయ్యెడ వైరం
బులు పెంచుధనము నేటికిఁ
గలిగించితి వీజగమున ఘననరసింహా

63. తల్లినిబిడ్డలు బిడ్డలఁ
దల్లియు భగినులను నన్నదమ్ములు హితులుం
గల్లరులై ధనమునకై
చల్లగ మోసంబొనర్తు జయనరసింహా

64. స్వార్ధపరులైన దుర్మతు
లర్ధమునార్జించి కీర్తినాశింపరు స
ర్వార్ధప్రదునిను గాంతురు
స్వార్ధత్యాగులుగదయ్య జయనరసింహా

65. అందఱు పరమార్థమతిం
జెంది చరించిననుగీర్తి జెందదెవరికిన్
గొందఱు లోభులునుండినఁ
బొందుయశము నొక్కపుణ్యపురుషునృసింహా!

66. ధృతరాష్ట్రు నగ్రపుత్రుఁడు
హితమతి ధర్మాత్ముఁడైననిఁక ధర్మజు సం
గతియేలవ్యాసునకు భా
రతరచనావసరమేల రమ్యనృసింహా

67. పరు నష్ట పఱచుమతికిఁ
బురుడింపఁగరానిసుఖముఁ బొందుధరిత్రిం
బరులాభం బెదగోరెడు
పురుషుండిహసుఖముగోరఁబోడు నృసింహా

68. పరహితరతమతి నెన్నఁగ
బురుడింపఁగరాని యశము బొందుధరిత్రిం
గురుతరసుఖమానసుఁడై
పరమపదమునందుఁజేరు భవ్యనృసింహా

69. ధర్మమునకె త్త్రైశంకుఁడు
ధర్మసుతుఁడు నలుఁడు రామధరణీశ్వరుడున్
నిర్మలకీర్తిధనులు స
త్కర్ములు బాధలుసైచిరి కద నరసింహా

70. సత్యమునకు సంకెలలు న
సత్యమునకు నందలములు సత్యముచుమ్మీ
సత్యరతుఁడు దివికేగియు
నిత్యము బుధవరులు పొగడఁ నెగడునృసింహా

71. సురవైరిని యాచించుట
సురలకొఱకెకాని నీదు సుఖమునకా నీ
పరహిరశీలమె రత్నా
భరణంబైయొప్పె నీకు భవ్యనృసింహా

72. కపిలుడవై ఘనతత్వము
నుపదేసించితి విదేవహూతికి దయతో
నపగతకల్మషులకు నీ
కృపగల్గును మంగళాద్రిశ్రీనృసింహా

73. వెజ్జవు భవరోగములకు
నొజ్జవు విద్యలకు భుదజనోత్తములకు నీ
ముజ్జగముల కీశుఁడవని
సజ్జనులు నితింతురయ్య జయనరసింహా

74. దనుజపతికి మోక్షపురీ
ఘనతరపట్టాభిషేక కాలమునందున్
గనకపు సింహాసనములు
ననఘ మునీయూరుయుగళమయ్యెనృసింహా

75. నీపాదసేవకులకును
రూపింపగ సుప్రసన్న రూపివి పరసం
తాపకులకు గోపకులకు
పాపులకును భయకరుడవు భవ్యనృసింహా

76. ఎక్కడజూచిన నీవే
యొక్కరుడవు పిక్కటిల్ల యుండెదవైన
న్నిక్కము దెలియనివారల
కెక్కడజిక్కవుగదయ్య యీశనృసింహా

77. సతులును నెఱగనివారు విద్యో
న్నతి నెఱగనివారు పేదనరులును సత్య
వ్రతులై నమ్మిన బ్రోతువు
హితకారివి సర్వసముఁడ వీవు నృసింహా

78. కులమును మతమను భేదము
దలపంగా నీకులేదు దయఁజూతువు నిం
దలచిన నిర్మలచిత్తుల
కలుషంబులు వాపిబ్రీతి ఘననరసింహా

79. ప్రణవస్వరూప! నీపైఁ
బ్రణయంబునవినుతిజేసి ప్రణతులొనర్తుం
గణుతింపరాని పదవిం
గణనాతీతుఁ డఁయొసంగగదె నరసింహా

80. సత్యం బెఱుంగఁజాలరు
సత్యముబలికంగలేరు సాధుజనుల యౌ
న్నత్యంబుఁజూచి సైఁపరు
సత్యంబీమాట దుష్టజనులు నృసింహా

81. లోకావళి యెల్లప్పుడు
నీకుక్షి నడంగుఁ బొడము నిలుచు న్వెలుగుం
లోకేశ! నిను నుతింపఁగ
నాకలవియె మంగళాద్రి నవ్యనృసింహా

82. నిర్మలహృదయులఁ జేయుమి!
ధర్మంబులు దెలిపిమాకు దండ్రీ! మాదు
ష్కర్మములఁబాపి ప్రోవుమి
శర్మదచారిత్ర దేవ జయనరసింహా

83. ఒకసుంత చదువొసంగితి
వకలంకానిను నుతింపనయ్యెనునాకున్
సకలజ్ఞనుగానుసుమీ
యకలుషదయనేలు మంగళాద్రినృసింహా

84. పతియును గురుజనులును గడు
హితమతులగుటన్నుతించి యిటువ్రాసితినో
నితనీయ యెల్లవారల
హితవిద్యోన్నతుఁలజేయు మీవునృసింహా

85. భువనభరం బుడిపిన నీ
యవిరళ మహిమాన్వితములు ననఘంబులు నీ
యవతారంబులు పొగడఁగ
నెవనివశంబైనఁ జెప్పనెంతునృసింహా

86. ఖలుఁడగు నసురుఁడు ప్రాజదు
వులు హరియింపంగ వానిఁ బొలియించిననీ
జలచరతనువు నుతింపఁగ్
నలవియొకో మంగళాద్రి యమలనృసింహా

87. మేటిగిరి భరించితి తా
మేటివినై దేవతలకమృతమిడితివిగా
బోటివినై నీకగు స
య్యాటలె యీపనులు మంగళాద్రినృసింహా

88. పటుదంష్ట్రా భీకరయుని
సటాజనితవాతభిన్న జలదౌఘంబౌ
కిటిరూపంబున దైత్యుని
హటమఁడచితిగాదె మంగళాద్రినృసింహా

89. శరదిందురేఖఁబోలెడు
వరదంష్ట్రాగ్రమునఁదాల్ప వన్నెదలిర్చెం
ధరపుణ్యమేమిచేసెనొ
యరయంగా దేవ మంగళాద్రినృసింహా

90. నరరూపము సగము మహా
హరిరూపము సగము తాల్చి యమరులు వొగడన్
బరువడిఁగంబమువెడలితి
సురవైరికుమారుఁబ్రోవ శుభనరసింహా

91. శిఖసమములు వజ్రాయుధ
సఖముల్ దనుజేంద్రుఁగూల్ప ధన్యాత్ములకు
న్సకములు సుఖములు నఖముల
నఖిలేశా! మదిదలంతునయ్యా నృసింహా

92. శుభకరమున బ్రహ్లాదుని
కభయమొసంగితివి మాకు నాగతి దయతో
నభయంబొసంగు మరివ
ర్గభయంబునుబాపి శ్రిశరమ్యనృసింహా

93. అరుణనటాభరచరితా
ధరభ్రూకుటికుటిలధవళ దంష్ట్రోజ్జ్వలమౌ
నరసింహరూపమెంచిన
నరుఁడౌగదవయ్య మంగళాద్రినృసింహా

94. నిశ్చలభక్తుని బ్రోవగఁ
గుశ్చితు నాభువనకంతకునిఁ గూల్పగనే
మాస్చర్యమార్తరక్షక
నిశ్చలమతినిమ్ముమాకు నేడునృసింహా

95. వామనుఁడవునై భువన
స్తోమంబులు పాదయుగముతోఁ గొల్చితిగా
నీమహిమ వింత సురర
క్షామన మమ్మేలు మంగళాద్రినృసింహా

96. భీమకుఠారంబున భృగు
రాముఁడవైదుష్టులైన రాజన్యుల సం
గ్రామమునఁగూల్చిజగదభి
రాముడవై యలరినావు రమ్యనృసింహా

97. దశవదన వదనపంకజ
శశివై రఘురాముఁడౌచు జనియించితివా
దశరధపుణ్యఫలమవై
యసదృశచారిత్ర మంగళాద్రినృసింహా

98. కృష్ణార్తి హారివై రిపు
జిష్ణూడవై నిహతగర్వ జిష్ణుడవగుచున్
గృష్ణరహితులనుబ్రోచితి
కృష్ణాఖ్యను మంగళాద్రిశ్రీనృసింహా

99. నను నెవ్వరు దూషించిన
ఘనదేహా వారియందు గార్పణ్యంబున్
మనమునఁజొరనీకుండెడు
ఘనశక్తి నొసంగునాకు ఘననరసింహా

100. విశ్వమయుత నొప్పెడు నో
విశ్వేశ్వర! నిదురూపు విమలాత్ములునై
శాశ్వతభక్తిఁ దలంచిన
శాశ్వతసుఖపదవిగలుగు జయనరసింహా

101. దివ్యంబై మునిజనసం
సేవ్యంబై రవిసహస్ర భాస్వరమై సం
సేవ్యంబు సుజనులకు నో
యవ్యయ నీరూపు మంగళాద్రినృసింహా

102. ఈయుగపుమహిమయేమో
మాయోపాయంబులేక మనలేరెవరున్
మాయోపాయములేని య
మాయకు వంచింత్రు దుష్టమతులు నృసింహా

103. కలికాలమహిమసతులను
దలఁపగా సతులె తిట్టఁదలతురు కట్టా!
పలుకం దెలియ నశక్యం
బిల దుష్టులమానసంబు లీశనృసింహా

104. పరులను వంచనసేయక
పరహితరతమతియుగలిగి వర్తించిన నా
నరులఁ దెలివిహీనులఁటని
దురితాత్ములు గేలిసేయుదురు నరసింహా

105.ఇతరుల యమాయకత దు
ర్మతులు దెలివిహీనతయని మదినెంతురు పాం
డుతనూజులసాధుత్వము
దృతరాష్ట్రతనూజులెఱిగిరే నరసింహా

106. పరసతిఁ దన సోదరిగా
నరయుచు వారియశముగని హర్షించెడు నా
పరమపురుషులకు నిరతము
వరభక్తి నమస్కరింతు వరనరసింహా

107. నిర్మలచిత్తుల హృదయము
నిర్మలమే యనుచుఁ దెలియనేరరుకుమతుల్
నిర్మలమతులంజేయుమి
నర్మిలి నీవెల్లవారి నన్యనృసింహా

108. బిడ్డల యందైనను కడు
చెడ్డతనముగలుగువారి సేవింత్రుమదిం
దొడ్డగ వెఱతురు నోటికిఁ
జెడ్డతనమె మంచిదేమొ శ్రీనరసింహా

109. అపనిందలమోపి ననుం
గపటముతోఁజూచి చుల్కగనెంచిన నీ
చపుఁగఠినోక్తులు వల్కి న
నెపుడును ఘనశాంతమిమ్ము యీశనృసింహా

110. ఘనకీర్తి యిహమునను బర
మునముక్తి నొసంగి మోదమును జూపుము నీ
కృపఁగోరితి శ్రీకరుడవు
నపగతకల్మషుడ మంగళాచలరమణా

111. కరుణానిలయుడ వాశ్రిత
వరదుండవు సాధుహృదయవాసుడవని నే
దిరముగ నమ్మితి గూరిమి
నరయుమి నరసింహమంగళాచలరమణా

112. గీ. మాల్యశైలేంద్రశృంగాంగ్ర మణివిరాజి
తీకృతివి నీవె శ్రీమంగళాద్రిశృంగ
వాసుఁడవు నీవెయోభక్త వరదమాకు
సర్వశుభములు ప్రీతినొసంగుమయ్య

113. గీ. పరమశాంతము నిమ్మంచుఁ బరమభక్తి
వేడుచుంటిని దయలేదె విశ్వమూర్తి
యక్కటా తలచూపు నహంకృతి యపు
డప్పుడిది యేమిపాపమో యరయజాల

114. ఉ. హరికి మంగళాద్రిశిఖరవిహారికి వేదమార్గసం
చారికి సాధుమానసన్మణిమందిరసుందరసుప్రచారికిన్
కూరిమినేలు మము కోరికలీరికలెత్త మ్రొక్కుడుం
సారవిచారమానసను సజ్జనసన్నుతిపాత్రజేయగన్

115. ధననష్టమైనగానీ
నను జుల్కనచేసి తూలనాడిన విడనా
డిన నేరినైన గినియక
ఘనశాంతముతో జరింపగాధృతినిమ్మా

116. గీ. మోసకారితనము దోసకారితనంబు
మాయనిచ్చకంపు మాటనేర్పు
పరధనంబుకాసపడెడుమానసవృత్తి
మాకు వలదు చుమా నృసింహా

సమాప్తం