శ్రీదుర్గామల్లేశ్వర శతకము - చల్లా పిచ్చయ్య

శ్రీదుర్గామల్లేశ్వర శతకము

                                               -- చల్లా పిచ్చయ్య

1. శా. శ్రీమంతంబగు నీమహామహిమ వర్ధిష్ణుత్వమొక్కొక్కచో
శ్రీమంతుంబొనరించె నొక్కొకని మున్ శ్రేయస్ప్వరూపమ్మునన్
స్వామీ! నేఁడటె "కోటవీరశరభ ప్రజ్ఞాబ్ధులన్" బేర్మి దు
ర్గామల్లేశ్వర సర్వదేవ పరివారా! హారహీరాకృతీ!

2. శా. శ్రీమించు ల్గల నీపురి న్నలుగడన్ జేబూని ఖడ్గంబరి
స్తోమమ్ము న్విదళించి భైరవ తను జ్యోతుల్ప్రదీపింపఁగా
యామమ్ముల్కనిపెట్టు దిస్సమొలదీవ్యత్ఖ్సేత్రపాలుండు దు
ర్గామల్లేశ్వర సర్వదేవ పరివారా! హారహీరాకృతీ!

3. శా. ఓమాకారము వక్రతుండమును దంతోధ్భూత కాంతిచ్ఛటల్
మైమై త ద్యమునా సరస్వతుల శుంభద్రేఖఁగాన్పింపఁ ద్వ
త్ప్రేమస్థానము "సిద్ధి బుద్ధి" పతి సేవించున్గజాస్యుండు దు
ర్గామల్లేశ్వర సర్వదేవ పరివారా! హారహీరాకృతీ!

4. శా. చామంతీ నవమల్లికాది సుమగు చ్ఛస్వచ్ఛసౌగంధ్య మి
మ్మౌమూర్తింబ్రకటించుచున్ సకలశాస్త్రామ్నాయసంధాతశో
భామధ్యందినభాస్కరుండెసఁగు సుబ్రహ్మణ్యుఁడౌఁజెంత దు
ర్గామల్లేశ్వర సర్వదేవ పరివారా! హారహీరాకృతీ!

5. శా. ధీమాంద్యమ్ముదొలంచి సన్మకుట పంక్తిస్ఫీత ముక్తాఫల
శ్రీమద్విద్రుమహేమనీలసితరొచిఃక్రాంతకాంతాస్యముల్
భూమానందమొసంగ నీదరిని పొల్పుంగూర్చుగాయత్రి దు
ర్గామల్లేశ్వర సర్వదేవ పరివారా! హారహీరాకృతీ!

6. శా. మై మించుల్ గలవల్వ కైవిలు తలన్ భాస్వత్కిరీటంబు వీ
క్షామార్గమ్మును నిల్ప నీడయు భుజాస్కంధంబులొప్పన్ గుణ
గ్రామశ్రీనిథి రామచంద్రుఁడు శుభాకారుండునిన్గొల్చు దు
ర్గామల్లేశ్వర సర్వదేవ పరివారా! హారహీరాకృతీ!

7. శా. హేమంబుంగురియించు మేనిసిరి హాయింగూర్చుచున్ సర్వదా
యామోదంబు ఘటింప రామవిభు నిత్యానందరూపంబు భా
మా ముంగొంగుపసిండి నినొలుచు సంపద్వల్లిగోపుత్త్రి దు
ర్గామల్లేశ్వర సర్వదేవ పరివారా! హారహీరాకృతీ!

8. శా. భీమాకారపరాక్రమక్రమము జూపింపం గడుం జాలియున్
భూమిన్ మించినశాంతి జాలియును నెమ్మోమెత్తితెల్పన్ తధు
స్వామి స్వచ్ఛయశంబు వెల్లగొడుగౌ సౌమిత్రినిన్గొల్చు దు
ర్గామల్లేశ్వర సర్వదేవ పరివారా! హారహీరాకృతీ!

9. శా. భూమీశాకృతి భాతృభక్తి యువరూపుంగొన్న వైరాగ్యమౌ
రామప్రేమసుదాబ్ధి చంద్రముఁడు ధర్మప్రాణ మౌదార్య వి
ద్యామర్త్యత్యము యోగిరాడ్భరతుఁ డుద్యద్భక్తి నిన్గొల్చు దు
ర్గామల్లేశ్వర సర్వదేవ పరివారా! హారహీరాకృతీ!

10. శా. సీమస్థానమతిక్రమించువిధదోషిన్ వార్ధిరామక్రియన్
సీమస్థానమతిక్రమించువిషదో షిం దున్మి పేర్గన్న ని
ర్ధూమాతిప్రతిమప్రతాపరవిశ త్రుఘ్నుండు నిన్గొల్చు దు
ర్గామల్లేశ్వర సర్వదేవ పరివారా! హారహీరాకృతీ!

11. శా. శ్రీమద్రామకథామృతం బిల నవిచ్ఛిన్నంఉగాఁ గ్రోల్చుచున్
రామధ్యాననిమగ్నతన్ మొగిఁబరబ్రహ్మమ్ముగాఁ జూచుచున్
మైమౌంజీముఖచిహ్నముల్ గల హనూమంతుడు నిన్గొల్చు దు
ర్గామల్లేశ్వర సర్వదేవ పరివారా! హారహీరాకృతీ!

12. శా. ప్రామింకుల్రతనాలపేటిజగతీ భాగ్యప్రభోదంబు తే
జోమూలంబు సువర్తులాకృతిమహా స్త్సోమంబు బాహ్యాంతర
వ్యామోహాగ్ర తమోనివర్తకము భా స్వన్మూర్తి నిన్గొల్చు దు
ర్గామల్లేశ్వర సర్వదేవ పరివారా! హారహీరాకృతీ!

13. శా. వ్యోమాలంకృతినిర్మలాకృతికలా పూర్ణుండుసర్వౌషథీ
భూమానందము కౌముదీనిధి భవ న్మూర్ధప్రసూనంబు నం
భోజమంజూషదృగుత్పలప్రసవక ర్పూరంబునిన్గొల్చు దు
ర్గామల్లేశ్వర సర్వదేవ పరివారా! హారహీరాకృతీ!

14. శా. భూమిప్రేమనిదానభూమి నిధిసం పూర్ణప్రమోదావహ
స్థేమస్థానవదాన్యమౌళి విలసత్సిందూరమందార తే
జోమీమాంస కుజుండు నిన్నుమదినెంచుంన్భక్తి యుక్తాత్మ దు
ర్గామల్లేశ్వర సర్వదేవ పరివారా! హారహీరాకృతీ!

15. శా. సామానూనవచఃప్రదాతమిధునా శాస్యప్రయుక్తాస్యుఁడో
జోమైత్రిలతికాలవాలముకలా స్ఫూర్తిస్ఫురన్మూర్తి మే
ధామకందము సౌమ్యుఁడంచితుఁడు చెంతంగొల్చునిత్యంబు దు
ర్గామల్లేశ్వర సర్వదేవ పరివారా! హారహీరాకృతీ!

16. శా. సామంజస్య గుణప్రశంస్యుఁడు సదాచార ప్రచార స్థిర
క్షేమాకారుఁడు వీక్షణప్రణుదితా శేషదోషుండు ధీ
సామగ్రీప్రతిపాదకుండు విబుధాచార్యుండు నిన్గొల్చు దు
ర్గామల్లేశ్వర సర్వదేవ పరివారా! హారహీరాకృతీ!

17. శా. గోమాణిక్య కలావిశేషము వచో గుంభప్రియం భావుక
శ్రీమేదః పరిపుష్టి సర్వసుకలా సిద్ధాంత ఘంటాపథ
గ్రామాభ్యంతర సీమ కావ్యుఁడు శుభాకారుండు నిన్గొల్చు దు
ర్గామల్లేశ్వర సర్వదేవ పరివారా! హారహీరాకృతీ!

18. శా. ద్యోమార్గంతరమందగామి యఘ యాదోరాశి, నిర్మగ్న చే
తోమంథానము, తావకీనగళవిద్యోతప్రమేయాత్మ శో
భా మూర్తి స్ఫుర, శౌరి కొల్చు నిను శుంభద్భక్తిసంయుక్తి దు
ర్గామల్లేశ్వర సర్వదేవ పరివారా! హారహీరాకృతీ!

19. శా. భూమీశత్వ ముఖ ప్రకృష్ట పదవీ భూయస్త్వ సంపాదనో
ద్దామప్రఖ్యుఁడు రాహు భోగమకుటోద్యద్ద్యోత రత్నప్రభా
స్తోమద్రావిత రోదసీ తిమిర సందోహుండు నిన్గొల్చు దు
ర్గామల్లేశ్వర సర్వదేవ పరివారా! హారహీరాకృతీ!

20. శా. ప్రేమం దా సమసప్తకంబున సదా వీక్షించుచున్ రాహువున్
సోమున్ సూర్యుని మిత్రదృష్టిఁగనుచున్ శుద్ధాంతరంగమ్ముతో
క్షేమంబున్ మదిఁగోరి కేతువును నీసేవం బ్రవర్తించు దు
ర్గామల్లేశ్వర సర్వదేవ పరివారా! హారహీరాకృతీ!

21. శా. తా మేలౌయవధూతయయ్యు మహిశాస్తన్ లోఁబరీక్షింప నే
మేమో వింతలుపన్ని లంపటునియట్లే తోఁచి మూర్తిత్రయో
ద్ధామప్రస్ఫుటధామమై వెలయుఁదత్తాత్రేయుఁడౌమ్రోల దు
ర్గామల్లేశ్వర సర్వదేవ పరివారా! హారహీరాకృతీ!

22. శా. క్షామాడంబరమున్ సృజింపఁగల దుశ్చారిత్ర దుస్త్రంత మి
థ్యా మూలంబుల దుర్మతేభముల వాదస్ఫార సింహద్వనిన్
బ్రామిన్కుల్వెలయించు శంకర పరివ్రాట్చంద్రుఁడీ వౌదు దు
ర్గామల్లేశ్వర సర్వదేవ పరివారా! హారహీరాకృతీ!

23. శా. సామోధ్భూతము నాదరూపమును నౌ సంగీత రత్నాకరం
బామూలంబు మథించి సత్కృతుల గేయంబౌ సుధాధార శ్రీ
రామ బ్రహ్మముఁదన్పు త్యాగయ్య సదారంజిల్లు మీమ్రోల దు
ర్గామల్లేశ్వర సర్వదేవ పరివారా! హారహీరాకృతీ!

24. శా. సామర్థ్యంబున శృంగ శబ్ధధృతి ప్రాశస్త్యంబు బోధింపఁగా
భీమంబౌ నిజ కంఠనాదమున దుర్వీరు ల్భయంబందఁగా
నీముందే నివసించి నిన్నుఁ గొలుచు న్నిర్ణిద్రుడౌ నంది దు
ర్గామల్లేశ్వర సర్వదేవ పరివారా! హారహీరాకృతీ!

25. శా. బూమేల్వన్నెడు చెట్టరక్కసులు వాపోవంగ గర్జిల్లుచున్
బాముల్వెట్టెడు కిల్బిషేభవితతిం బాదాహతిన్ వ్రచ్చుచున్
నేమంబొప్పఁగ సింహవాహనము నిన్నిత్యమ్ము సేవించు దు
ర్గామల్లేశ్వర సర్వదేవ పరివారా! హారహీరాకృతీ!

26. శా. ఐమాకారము దుర్గయందుఁగల యయ్యష్టాక్షరీ సారమున్
భా మల్లేశపంబున న్వెలయు త త్పంచాక్షరీ సారమున్
దామేకత్వముఁజెంది యిక్కలిని భక్తత్రాణముంబూనె దు
ర్గామల్లేశ్వర సర్వదేవ పరివారా! హారహీరాకృతీ!

27. శా. నీమస్తంబువలెన్ జడల్ గలతలల్ నెమ్మేన భస్మం బెదన్
నీమంత్రంబుసతంబు నిండుకొనఁ బూంకి న్నీ సమక్షంబునన్
గోమౌమూతుల శృంగిభృంగిరిటి ముఖ్యుల్కొల్తు రెల్లప్డు దు
ర్గామల్లేశ్వర సర్వదేవ పరివారా! హారహీరాకృతీ!

28. శా. నీమ్రోయించెడుఢక్క కారణముగా నిష్పన్నమై సర్వదా
స్వామిత్వప్రతిపాదకత్వమునకౌ శబ్దప్రధానమ్మునై
నీమూలస్థితిఁదెల్పు వ్యాకరణము న్నిందెల్పు నిత్యంబు దు
ర్గామల్లేశ్వర సర్వదేవ పరివారా! హారహీరాకృతీ!

29. శా. నేమం బొప్పఁగఁ జండశాసనమున న్నీరేజ జాండంబులన్
సామర్థ్యంబున మంచిచెడ్డలను విశ్వాసోక్తి బోధించుచున్
నీ మహాత్మ్యము దెల్పుశిక్షయును బూన్కి న్విశ్వసంరక్ష దు
ర్గామల్లేశ్వర సర్వదేవ పరివారా! హారహీరాకృతీ!

30. శా. ధూమంబెచ్చట నగ్నియచ్చటను సూక్తుల్చూపికార్యాత్మకం
బౌ మాయా శబలంబు విశ్వమున ముఖ్యంబౌ నుపాదాన మీ
వే ముమ్మాటికటంచుఁ దర్కమును నెంతేఁదెల్పు సర్వత్ర దు
ర్గామల్లేశ్వర సర్వదేవ పరివారా! హారహీరాకృతీ!

31. శా. భూమింజేసిన యజ్ఞసాధనము రూపున్ వీడినన్ సంస్కృతిన్
దీమంబైన యపూర్వమే ననుచు నందించున్ ఫలంబంచు వా
క్సామర్థ్యంబును జూపుఁగర్మవిధి విశ్వాసంబు మీమాంస దు
ర్గామల్లేశ్వర సర్వదేవ పరివారా! హారహీరాకృతీ!

32. లోమాటైన యథార్ధతత్త్వముననౌ లోతుల్ ప్రభోదించుచున్
సామోదంబుగ సర్వశబ్దముల నీయందే సమర్పించి నీ
ప్రామాణ్యంబు దృఢంబుఁజేయు భువినెప్పాటన్ నిరుక్తంబు దు
ర్గామల్లేశ్వర సర్వదేవ పరివారా! హారహీరాకృతీ!

33. శా. ఆమూలాగ్రము సర్వశాఖలను నిత్యాచారసంపత్తి న
య్యైమార్గంబుల నిల్పుపొంటె విధులన్ వ్యాపింపఁగాఁజేసి ది
వ్యామోదంబగు కల్పకల్పకము నీ యాహ్లాదమౌఁగాదె దు
ర్గామల్లేశ్వర సర్వదేవ పరివారా! హారహీరాకృతీ!

34. శా. శ్రీమించు ల్కల నిల్వుటద్దమున మూర్తిస్ఫూర్తులట్టుల్ జగ
ద్వ్యామిశ్రంబగు జీవికర్మము గ్రహ వ్యావృత్తి బోధించుచున్
నీమన్కిందగు జ్యౌతిషంబు తెలుపున్ నీసాక్షిభావంబు దు
ర్గామల్లేశ్వర సర్వదేవ పరివారా! హారహీరాకృతీ!

35. శా. నేమంబొప్పఁగమాత్రలున్ గురువులున్నిందగన్ గణమ్ముల్ మహా
శ్రీమాన్యంబులువృత్తముల్ వెలయఁగాఁద్రిష్టుమ్ముఖమ్ముల్ సదా
ధీమల్లిన్విరియుంచు ఛందమును వర్ధిష్ణుత్వ సంపాది దు
ర్గామల్లేశ్వర సర్వదేవ పరివారా! హారహీరాకృతీ!

36. శా. భూమిన్ ద్యోతలమందునం జెలగు జీవుల్ పుట్టుటల్ పుట్టితా
మే మాద్రింజరింయింపఁగా వలయునో, యేజీవికాహారమె
ట్లోమేలోధులెట్లొ సర్వమును దెల్పున్ ఋక్కునీయూర్పు దు
ర్గామల్లేశ్వర సర్వదేవ పరివారా! హారహీరాకృతీ!

37. శా. ద్యోమేది న్యనుబంధముందెలుపు విధ్యుక్తాధ్వరశ్రేణి సు
త్రామాదుల్ తవియంగఁ జేయునది కర్మ బ్రహ్మరూపంబుగా
నామంత్రించు యజుస్సుసూక్ష్మముశిరంబశ్రాంతమున్నిన్ను దు
ర్గామల్లేశ్వర సర్వదేవ పరివారా! హారహీరాకృతీ!

38. శా. భూమాశ్చర్యకరంబులై తగి నభో భూభాగమున్నిండి సం
ధామూలమ్ముల నస్త్రశస్త్రముల మంత్రస్వీయశక్తిన్ ఖల
స్తోమమ్మాపు నధర్వవేదమును నిన్ ధ్యానించు మోదించు దు
ర్గామల్లేశ్వర సర్వదేవ పరివారా! హారహీరాకృతీ!

39. శా. పాముల్ జంతులు బాలకుల్ తనియ శ్రావ్యంబైన నీరూపు వీ
ణా మధ్యంబుమ@<దంత్రులందిరుగురాణంజూపిచొక్కించుచున్
సామంబెప్డును నీమహామహిమ విశ్వాసాత్మఁగీర్తించు దు
ర్గామల్లేశ్వర సర్వదేవ పరివారా! హారహీరాకృతీ!

40. శా. సోముండై జనదృక్చకోరికలమెచ్చుల్ కోరికల్ దీర్చుచున్
వేమా`రున్ దృఢభక్తిలోదలఁచునీవిశ్వాత్మమాహాత్మ్యమున్
సామోక్తింగొనియాడు నిత్యమును పుచ్చాకోటయాఖ్యుండు దు
ర్గామల్లేశ్వర సర్వదేవ పరివారా! హారహీరాకృతీ!

41. శా. భూమిన్ జీవుల జీవితంబును సతంబున్ బూతముంజేయు నౌ
గోమూర్తుల్ కపిలాకృతుల్ వలయుకోర్కుల్గూర్పఁ బోషించుచున్
శ్రీమాల్యంబులగొల్చుచుంద్రు మువురుంజిత్తమ్ములుప్పొంగ దు
ర్గామల్లేశ్వర సర్వదేవ పరివారా! హారహీరాకృతీ!

42. శా. నీమెచ్చందగు వారలందనుపుచున్ నిన్ బూలఁబూజించుచున్
నీమీదంగల కబ్బముల్ నలుగడన్ నిండించుచుంద్రచ్చుచున్
నీమంత్రంబు జపింతు రీమువురుబూన్కిన్ సర్వకాలంబు దు
ర్గామల్లేశ్వర సర్వదేవ పరివారా! హారహీరాకృతీ!

43. శా. నీమూలంబుననే సమస్తజగముల్ నిర్ణిద్రతం గాంచుటల్
నీమాహాత్మ్యమె పండువెన్నెలవలెన్ నీరంధ్రమైనిండుటల్
నీమించే జగమౌటలీమువురు లో నేర్పప్ప భావింత్రు దు
ర్గామల్లేశ్వర సర్వదేవ పరివారా! హారహీరాకృతీ!

44. శా. బాముల్వేలకొలంది యెత్తి భువిసంపాదించుకొన్నట్టి మే
లౌ మానుష్యఫలంబునిన్ దెలియుటేయంచున్ సదాయెంచుచున్
ప్రామాణ్యంబునఁ గొల్చుచుంద్రు మువురున్ బాహ్యాంతరావృత్తి దు
ర్గామల్లేశ్వర సర్వదేవ పరివారా! హారహీరాకృతీ!

45. శా. సామేనై యలకోటయాఖ్యునకు భాషాదేవియు న్మెచ్చనౌ
శ్రీ మేధానిధియై గుణప్రతతికిం జెల్వొందులేఁదీవెయై
రామారత్నము కొల్చు నిన్ కనకదుర్గాంబా యశఃపేటి దు
ర్గామల్లేశ్వర సర్వదేవ పరివారా! హారహీరాకృతీ!

46. శా. శ్రీమంతంబగు బేతపూడి కులవర్ధిం జంద్రుఁడై ధీబల
స్థేమాకారము నామముందలఁచి దుశ్చిత్తుల్భయంబంద నీ
స్వామిత్వమ్ము గణించు వీరశరభ ప్రఖ్యుండు నిత్యంబు దు
ర్గామల్లేశ్వర సర్వదేవ పరివారా! హారహీరాకృతీ!

47. శా. నీమూర్తింగనిదోయి గప్పురముగా నీపాదసంస్పర్శమున్
మైమీదన్ హరిచందనమ్ముగను నామమ్మున్ మరందమ్ముగా
నీమూవుర్తలపోయుచుందు రెద హాయిన్ నిత్యమున్ భక్తి దు
ర్గామల్లేశ్వర సర్వదేవ పరివారా! హారహీరాకృతీ!

48. శా. నేమంబొప్పఁగ వేదరూపముననౌ నీశాసనంబందు నీ
వేమార్గంబులఁ జూపినావొయటహాయింగాంచుచున్నిత్యమున్
వేమాఱుంగనుచుందురీమువురు భావిం త్రోలి సేవింత్రు దు
ర్గామల్లేశ్వర సర్వదేవ పరివారా! హారహీరాకృతీ!

49. శా. తామార్జించిన సంపదందెలిసి శ్రద్ధాళుల్ గుణాంభోనిధుల్
భూమానందము నీయనుగ్రహము సంపూర్ణమ్ముగా ధనధ
ర్మామేయముగ కోటవీరశరభ ప్రాజ్ఞుల్ సమర్పింత్రు దు
ర్గామల్లేశ్వర సర్వదేవ పరివారా! హారహీరాకృతీ!

50. శా. శ్రీమద్వ్యాసకృతోపదేశమున వర్ధిష్ణుండుగాండీవిమె
ప్పౌమాహేంద్రగిరిం దపంబునను గయ్యమ్మందుమెప్పించినీ
ధామమ్మున్ నిజనామధేయమున సార్ధంబౌనటు ల్సల్పె దు
ర్గామల్లేశ్వర సర్వదేవ పరివారా! హారహీరాకృతీ!

51. శా. ఏమేనింబొనరించు నీచముల మాయించున్ మహౌదార్యమున్
కామించున్ జెడుతిండి దుర్లభములెక్కాలంబుఁజింతించు సీ
యేమీ చిత్రము చిత్రముంగొలుపు క్షుత్తృష్ణల్గ్ దయాసాంద్ర దు
ర్గామల్లేశ్వర సర్వదేవ పరివారా! హారహీరాకృతీ!

52. శా. భూమింగల్గినజీవికెప్డు దివిషద్భోగమ్మువై, వారికిన్
భూమిశ్రీపయిబుద్ధి, గొల్పుచు జరం బూర్ణాత్మయై యింద్రియ
గ్రామమ్మున్ సురియించుఁగామ మకటారాదయ్యెనిన్గొల్వ దు
ర్గామల్లేశ్వర సర్వదేవ పరివారా! హారహీరాకృతీ!

53. శా. పాముంబోలుచు బుస్సఁగొట్టుబులిఠేవన్ బిట్టుగాండ్రిల్లుసం
గ్రామక్షోణి విహారమున్ సలుపు యుక్తాయుక్తశూన్యంబు హిం
సామేయంబగుఁగానిక్రోధ మతిదుష్టం బెన్నదింతైన దు
ర్గామల్లేశ్వర సర్వదేవ పరివారా! హారహీరాకృతీ!

54. సామర్ధ్యంబు దలంపదింతయిన విశ్వాసంబుపోకార్చు హే
లామందస్మిత ధైర్యసాహసికతా లజ్జాభిమానాదులన్
సీమాంతమ్ముగ గెంటు లోభమది యిస్సీరాదు నిన్గొల్వ దు
ర్గామల్లేశ్వర సర్వదేవ పరివారా! హారహీరాకృతీ!

55. శా. భామా పుత్త్రగృహాదులే భవముఁదేపంబోలి దాటించు నం
చేమోకల్పన లల్లిబిల్లిగఁ గడున్ సృష్టించుఁ గష్టంపడున్
నీమాయంచును భేదమెంచు వలపేనిన్ రాదు నిన్గొల్వ దు
ర్గామల్లేశ్వర సర్వదేవ పరివారా! హారహీరాకృతీ!

56. శా. సాముంజేయును మైకముంగొనును హేషల్ సల్పు ఘూర్ణిల్లుమే
ల్గీముం గానదు కన్నులుండియునుభుక్తిం దృప్తికింగాదు క్రిం
దై మృత్పిండముఁబోలుఁగాని మద మహా రాదు నిన్గొల్వ దు
ర్గామల్లేశ్వర సర్వదేవ పరివారా! హారహీరాకృతీ!

57. శా. ఏమాత్రంబు సహింపలే దొకనిమే లెప్డున్ వివాదించు లో
లోమూర్ఖత్వము వెల్లడించుఁబొరిమేల్కొల్పున్ బగన్ సర్వదా
యామాత్సర్యము నిన్నుఁగొల్చుటకుఁగాదయ్యా! దయామేయ దు
ర్గామల్లేశ్వర సర్వదేవ పరివారా! హారహీరాకృతీ!

58. శా. శ్రీమించు ల్నిధులెన్నియేని వెలయుం జెల్వొంది దివ్యౌషధీ
స్తోమంబు న్నెలకొల్పిగంధవతియై శోభిల్లి భూతత్త్వమున్
నీమేనేయగునయ్య దర్శనహృతానే కాఘ సర్వజ్ఞ దు
ర్గామల్లేశ్వర సర్వదేవ పరివారా! హారహీరాకృతీ!

59. శా. భూమాకారము భూమికారణము సంపూర్ణాయురారోగ్య సు
శ్రీ మూలంబు శుచి ప్రవర్తకమునౌ సృష్ట్యాదితత్త్వంబు జి
హ్వామోఘంబుత్వదీయమూర్తియగుఁగా సామోదసంస్తుత్య దు
ర్గామల్లేశ్వర సర్వదేవ పరివారా! హారహీరాకృతీ!

60. శా. శ్రీమెప్పుల్ విరియించు యజ్ఞహుతమున్ శీఘ్రంబ జేజేలకున్
బ్రేమంజేర్చుచు జాఠరాంతమునం బ్రేరేచు నయ్యగ్నియున్
నీమేనే యగునయ్య నిర్మల యశో నీరంధ్రభూత్యంగ దు
ర్గామల్లేశ్వర సర్వదేవ పరివారా! హారహీరాకృతీ!

61. శా. ద్యోమార్గంబునఁబట్టువందివెలిలో నుత్సాహముం గూర్చుచున్
సామోదమ్ముగ స్పర్శసౌఖ్యమిడి యత్యానందముంగూర్చుతా
నీమేనే యగునయ్య వాయువును వాణీగేయ సుధ్యేయ దు
ర్గామల్లేశ్వర సర్వదేవ పరివారా! హారహీరాకృతీ!

62. శా. పై మై వీడిన సర్వజీవతతి యప్రత్యక్షసంస్కారముల్
లోమైజేర్చుచువాయువృష్టిముఖతన్ లోకంబులన్ జొన్పుమిన్
నీమేనేయగుగాదె గాంగలహరీ నీర్యజ్జటాజూట దు
ర్గామల్లేశ్వర సర్వదేవ పరివారా! హారహీరాకృతీ!

63. శా. సామర్ధ్యంబున నర్ధవంతుఁడగుచున్ జాతాత్మయై పండితుం
డై మేఘాభశిరోజుఁడై హుతవాహుం బ్రార్థించునయ్యజ్వయున్
నీమేనే యగుఁగాదె యెన్నఁగ భవానీనాధ సమ్మోద దు
ర్గామల్లేశ్వర సర్వదేవ పరివారా! హారహీరాకృతీ!

64. శా. చీమంబోలుచుఁ గూడఁబెట్టిన మహాశ్రేయస్సులన్ దుర్లభం
బౌమానుష్యముఁ జెందియుంగడఁగి నిత్యానిత్య విజ్ఞాన ల
క్ష్మీ మర్యాద నతిక్రమించునెడ్ దూషింపంబడున్ బిట్టు దు
ర్గామల్లేశ్వర సర్వదేవ పరివారా! హారహీరాకృతీ!

65. శా. ఆముల్లోకములందు నాచరణమే యాత్మస్వరూపంబుగా
లోమై స్త్రీపురుషుల్ కనుంగొనఁగనై లోకంబుల న్నిల్పుత
త్క్షేమాకారము ధర్మ మీజగతి శాసించుం ద్విదీయాజ్ఞ దు
ర్గామల్లేశ్వర సర్వదేవ పరివారా! హారహీరాకృతీ!

66. శా. కామంబర్థము ధర్మయుక్తమగుచోఁ గల్పద్రుమంబేయగున్
కామంబర్హము నేకమైన జగముల్ కాలాహి వాతం బడున్
ధీమేదో బలయుక్తి దీనినెఱుఁగం దీఱుంబశుత్వంబు దు
ర్గామల్లేశ్వర సర్వదేవ పరివారా! హారహీరాకృతీ!

67. శా. నోముల్ నోమి కృశించి కష్టపడి యెన్నోపాట్లపాలై శుభ
శ్రీమేల్కొల్పుచు నేలుకోఁగల మహాప్రేమ స్వరూపంబు జి
హ్వామాధుర్యము కన్నతల్లి కెనయౌనా? స్వర్గమున్ భర్గ దు
ర్గామల్లేశ్వర సర్వదేవ పరివారా! హారహీరాకృతీ!

68. శా. క్షేమంబుం గలిగించు నోషధివలెం జేతఃప్రమోదావహం
బౌ మోచాఫలమైన పల్కుబడి సత్యంబుం బ్రహోదించుచున్
నీమేనేయగుఁ గన్నతండ్రి శ్రుతిని ర్ణిద్రాత్మ విజ్ఞాన దు
ర్గామల్లేశ్వర సర్వదేవ పరివారా! హారహీరాకృతీ!

69. శా. తాముప్పూటలబుద్ధికిం దగిన చందానం బ్రబోదించుచున్
ప్రేమన్ వృద్ధికివచ్చు పద్ధతుల రూపింపన్ గురుండౌ గురు
స్వామిన్ శిష్యుఁడునిన్నుఁగాఁదలపఁడా శ్చర్యంబగున్ నేఁడు దు
ర్గామల్లేశ్వర సర్వదేవ పరివారా! హారహీరాకృతీ!

70. శా. ప్రేమన్ వెల్లడిజేయుచున్ సెలవులన్ బెల్లుబ్బుపాల్నుర్వులన్
మోముంజేరిచి తల్లి పాలపొదుగున్ ముద్దైన లేలేఁగ పా
లౌ మేల్పాలును విల్చువాడు మనుజుండౌనా మహాదేవ దు
ర్గామల్లేశ్వర సర్వదేవ పరివారా! హారహీరాకృతీ!

71. శా. శ్రీమేదఃపరిపుష్టిఁ గూర్పఁగల సు క్షీరంబులం గ్రోల్చుచున్
భూమిన్ దున్నఁగభూరిభారముమెడన్ మోయన్ సమర్థంబులై
సోమస్వచ్ఛములైన వత్సముల నిచ్చుం గాదె గోమాత దు
ర్గామల్లేశ్వర సర్వదేవ పరివారా! హారహీరాకృతీ!

72. శా. మైమైరాయుచుఁ గర్నపుచ్ఛముల స మ్యక్ప్రీతిమై త్రిప్పుచున్
గోమైపయ్యెర నీ రెలుంగులిడునొ క్కుల్ బీటిమేఁతన్ మొగిన్
రోమంధం బొనరించు గోచయము దృగ్రూపంబురూపించు దు
ర్గామల్లేశ్వర సర్వదేవ పరివారా! హారహీరాకృతీ!

73. శా. ఈముల్లోకములందు నెన్నఁగనుగోవే జీవరత్నంబు గో
వే మందారము గోవె మేలుసిరి గోవే భూమి సర్వస్వమం
చే ముమ్మాఱువచింతుగట్తిగను మ్రోయింతున్ యశోఢక్క దు
ర్గామల్లేశ్వర సర్వదేవ పరివారా! హారహీరాకృతీ!

74. శా. ఆమంత్రించిన యంతభక్తిని హవిష్యంబున్ లసత్షడ్రస
శ్రీ మిశ్రంబగు భోజనమ్ముల నవిచ్ఛిన్నంబుగా మున్ను వి
శ్వామిత్రుంగృత వీర్యపుత్రు గని చేయన్లేదె సాశ్చర్యు దు
ర్గామల్లేశ్వర సర్వదేవ పరివారా! హారహీరాకృతీ!

75. శా. కామంబుల్ సఫలంబులన్ సలుపు తోకల్ పోల్చుప్రాధాన్యపుం
బ్రామాణ్య<బెఱిగించు శృంగములు నొప్పన్ నాల్గుపాదంబులన్
భూమిందిర్గెడు ధర్మదేవతలుకావో గోవులెన్నంగ దు
ర్గామల్లేశ్వర సర్వదేవ పరివారా! హారహీరాకృతీ!

76. శా. గోమూత్రంబు సమస్తపాపమయముల్ కుష్ఠాదులంబాచు మా
యామేయంబు భయంబు గోమయము మాయంజేయు గోధూళి ధూ
ళీ మిథ్యాంబుదపంక్తిమారుతముమౌళి ప్రక్కలాపేందు దు
ర్గామల్లేశ్వర సర్వదేవ పరివారా! హారహీరాకృతీ!

77. శా. సామోదంబగు గోఘృతంబొసఁగుదీ ర్ఘాయుష్యమున్ సారమున్
భూమంబుం బొనరించుఁబాలుదధి సంపూర్ణప్రసాదత్వమున్
ధామంబున్ సమకూర్చుసత్కవిగవీ తౌర్యత్రికస్తుత్య దు
ర్గామల్లేశ్వర సర్వదేవ పరివారా! హారహీరాకృతీ!

78. శా. తామంద ల్పొనరించి గోవుల నమం దానంద సాంద్రాత్ముఁడై
నేమంబొప్పఁగమేత నీరు తఱులన్ నిండించుచున్ గాలి రా
నౌమేరన్ విడియించుచుంగను దయా స్యందుండె ధన్యుండు దు
ర్గామల్లేశ్వర సర్వదేవ పరివారా! హారహీరాకృతీ!

79. శా. మామేల్మేఁతలకున్కిపట్టులు గదమ్మ బీళ్ళు వేల్సెసి ర
మ్మా! మార్తుల్ వినఁజెప్పఁజాలముగదమ్మ దిక్కు నీవేగద
మ్మా! మొఱ్ఱన్ వినుమన్న భావమునునంభారావముల్ తెల్పు దు
ర్గామల్లేశ్వర సర్వదేవ పరివారా! హారహీరాకృతీ!

80. శా. తమున్నర్జునుఁడై వధంబునకు శద్ధంగొన్న యశ్త్రంబు వి
ల్గా మాంసంబును బెట్టి సాహసికతం గన్నిచ్చి కన్నప్పయై
నీమెచ్చుంగొని కాలహస్తినిలఁడే నీమ్రోలఁ దిన్నండు దు
ర్గామల్లేశ్వర సర్వదేవ పరివారా! హారహీరాకృతీ!

81. శా. ఏమీయంచును నెల్లరబ్రపడఁ బైకేతెంచు వైవస్వతున్
వామాంఘ్రింబడఁదన్ని యేలుకొనవేబాలున్ మృకండూద్భవున్
నామప్రీణిత సర్వలోక! సహజానందా! దయాకంద! దు
ర్గామల్లేశ్వర సర్వదేవ పరివారా! హారహీరాకృతీ!

82. శా. చామంతుల్ విరిమల్లె బిల్వములు లక్షల్ కోట్లు పూఁదోఁటలన్
సామీచీన్యముగాఁగఁ గూర్చుకొని స్వచ్ఛంబైన డెందాన నీ
నామంబుంబ్రణవంబునుంగలిపి రాణన్ భక్తిఁబూజింత్రు దు
ర్గామల్లేశ్వర సర్వదేవ పరివారా! హారహీరాకృతీ!

83. శా. తామిస్రంబునఁ గూలనీయదు శుభస్థానంబునన్నిల్పు సు
శ్రీమేల్కొల్పుందల్చు భూతభయమున్ శీఘ్రంబుభక్తిప్రసూ
నామోదంబున గండుతేఁటియగు రుద్రాక్షంబు భద్రాక్ష దు
ర్గామల్లేశ్వర సర్వదేవ పరివారా! హారహీరాకృతీ!

84. శా. నీమూర్థమునఁ బొల్చుచంద్రరుచియై నీర్యజ్జటాజూటగం
గా మోఘాంబుఝరిప్రకాశ మయి భద్రాయుః కుమారాత్మతే
జో మూలంబగు భస్మమెన్నఁదరమా శుద్ధాంతరంగస్థ దు
ర్గామల్లేశ్వర సర్వదేవ పరివారా! హారహీరాకృతీ!

85. శా. ఆమోక్షంబను సౌధమెక్కుటకు నగ్ర్యంబైన సోపాన మా
యీమూర్తుల్ కనుదోయిఁదోఁచునవి నీవేయంచు బోధించుఁజూ
నీమంత్రంబు చరాచరప్రకట జన్మిస్తోమజప్యంబు దు
ర్గామల్లేశ్వర సర్వదేవ పరివారా! హారహీరాకృతీ!

86. శా. మ్హూమిన్ మర్త్యుని నెన్నుచో రసనయేమో పల్కబిట్టుల్కు నీ
దౌ మాహాత్మ్యము నెన్నఁబూన్కొన సహస్రాకారముల్ పూనుమే
మే మేమే యని శబ్దముల్ తమకుతామే సన్నిధింజేయు దు
ర్గామల్లేశ్వర సర్వదేవ పరివారా! హారహీరాకృతీ!

87. శా. లేమిన్లేమిఁబొనర్పఁగఁ గలుగు కల్మిన్నీసఖుంబోలి సు
త్రాముండోయన భూరిభోగములఁ బూర్ణత్వమ్మునంగ్రాలినన్
నీమూర్తిన్ వెలిలోనఁజూడనియెడన్ నిన్ జేరఁగాలేఁడు దు
ర్గామల్లేశ్వర సర్వదేవ పరివారా! హారహీరాకృతీ!

88. శా. భూమీధ్రమ్ము లగల్పజాలిన భుజాపుష్టి న్మరుత్సూనుఁడే
యఒ మార్తాండునిరేవశాత్రవులఁ దైక్ష్య్ణంబుం బ్రదర్శించినన్
భీముండేయయిన న్రణమ్మునను నిన్ సేవింపకెట్లొప్పు దు
ర్గామల్లేశ్వర సర్వదేవ పరివారా! హారహీరాకృతీ!

89. శా. ఏమున్ సల్పిన కర్మమేతనువు నాకెచ్చోటఁజేకూర్చినన్
స్వామీ నాకట ఱెప్పపాటయిన నన్యభ్రాంతికింగాక నీ
నామమ్మున్ స్మృతినిల్వఁజేయఁగదె చిన్నాళీకమత్తాళి దు
ర్గామల్లేశ్వర సర్వదేవ పరివారా! హారహీరాకృతీ!

90. శా. సౌమాంగల్యము పట్టుగొమ్మ సుకలాసంపల్లతాకేళికా
రామశ్రీ జగతీత్రయీస్థిత సతీరత్నప్రకాశంబు పూ
జా మూలంబుహరిద్రమాంగళిక సంస్థానం బనూనంబు దు
ర్గామల్లేశ్వర సర్వదేవ పరివారా! హారహీరాకృతీ!

91. శా. శ్రీమంతంబు పతివ్రతాస్యతిలక శ్రీసంధ్యారాగ ప్రవా
ళామేయారుణిమప్రకృష్టము హరిద్రాంతస్సముద్భూత ము
ద్దామప్రఖ్యము కుంకుమమ్ము సకలాంతర్యామిచిత్సాక్షి దు
ర్గామల్లేశ్వర సర్వదేవ పరివారా! హారహీరాకృతీ!

92. శా. ఏమోత్రవ్వుకొనున్ గతంబులను ముందింతైనఁజింతింపఁడా
పై మిన్ముట్టునొకప్డురిత్తగను డోలాందోళితాంతస్థ్సితిన్
నీమన్కిన్గనుటెట్లు నిన్ దలఁచుపూన్కిన్నిల్చుటెట్లౌను దు
ర్గామల్లేశ్వర సర్వదేవ పరివారా! హారహీరాకృతీ!

93. శా. తామేల్పట్టుననున్న యప్పుడనుభూతంబైన దానిన్ జగ
త్క్షేమమ్ముం బొనరించుపొంటె సలుపంజెల్లున్ విచారింప నే
నే మేధానిధినన్న గర్వమగునేని న్నిల్వదాపట్టు దు
ర్గామల్లేశ్వర సర్వదేవ పరివారా! హారహీరాకృతీ!

94. శా. ఏమంచున్ వచియింపఁజెల్లునకటా యీయింద్రియాభోగముల్
చీమల్ దోమలుగూడఁ బాలుగొను నిస్సీలెస్సలోనెంచి తా
నీమెట్టెక్కునుపాయమెల్లపుడు నన్వేషింపనౌఁగాదె దు
ర్గామల్లేశ్వర సర్వదేవ పరివారా! హారహీరాకృతీ!

95. శా. భూముఖ్యంబులఁ బంచభూతములనౌ మూర్తింగనంజాలుకన్
నీమూర్తింగనుటెట్లు దివ్యమును దండ్రీ! దివ్యమౌనీంద్రులే
లోమైజ్ఞానమయమ్ము నేత్రమున నాలోచించకన్గొంద్రు దు
ర్గామల్లేశ్వర సర్వదేవ పరివారా! హారహీరాకృతీ!

96. శా. నేమస్మిన్ వపుష స్సతీహృది ఫణి నేతానిశశ్శేఖరే
భీమం యస్య పురత్రయప్రహరణం భిల్లో స్త్రదాసేచ యో
నౌమిస్వాత్మని మల్లికార్జునమహంత మ్మండ్రు జేజేలు దు
ర్గామల్లేశ్వర సర్వదేవ పరివారా! హారహీరాకృతీ!

97. శా. ప్రామంజేయవె బత్తి నీపయిని బాబా పత్తిరింబూల నే
నీమైజల్లెద నిల్కడన్నిలుపవే నెమ్మిన్ సతంబున్ మదిన్
నీముందే నెలకొందునంచు గొలుతు ర్నిన్నాంధ్రులాసక్తి దు
ర్గామల్లేశ్వర సర్వదేవ పరివారా! హారహీరాకృతీ!

98. శా. లేమింబాపఁగదమ్మ తల్లి గుణమల్లి సూనసౌగంధ్య స
ర్వామోదప్రద పాదపద్మ నవరత్నామేయ కాంతిస్ఫుర
శ్రీమహేంద్ర ధనుస్స్మృతిప్రద సురశ్రేణీకిరీటౌఘ దు
ర్గామల్లేశ్వర సర్వదేవ పరివారా! హారహీరాకృతీ!

99. శా. లేమింబాపఁగదయ్య తండ్రి! గుణలాలిత్యాత్మసాహిత్య వి
ద్యామాధుర్య మధుద్రవోపహితహృద్యద్దివ్య సంగీత గో
ష్ఠీ మాంజిష్ఠ నిధీశ సౌహృదకలాచ్ఛిన్నాయసంఛన్న దు
ర్గామల్లేశ్వర సర్వదేవ పరివారా! హారహీరాకృతీ!

100. శా. నామొఱ్ఱన్వినుమమ్మ తల్లి! నిజకంఠ ప్రోత్థసప్తస్వర
గ్రామప్రస్ఫుటమూర్ఛనా గతిలయగ్రాహిస్వమాణిక్య వీ
ణా మోఘస్వరమాధురీచలదనంతానంతతానాంత దు
ర్గామల్లేశ్వర సర్వదేవ పరివారా! హారహీరాకృతీ!

101. శా. నామొఱ్ఱన్వినుమయ్య తండ్రి! భువనానందాను సంధాన వా
చా మోచాఫలశర్కరా మధురసా స్వాదితప్రతుష్టామర
స్వామిధ్యేయపదారవిందయుగ సేవామ్రనందీశ దు
ర్గామల్లేశ్వర సర్వదేవ పరివారా! హారహీరాకృతీ!

102. శా. నీమాహాత్మ్యమెఱుంగ శక్యమె సదానిద్రాళుకుక్షింభర
వ్యామోహాంధ నిరర్థమత్తక్షల దుర్వ్యాసంగ గర్విష్ఠ చిం
తామగ్నాధమ నాస్తిక ప్రతతికిన్ దారాపైస్తుత్య దు
ర్గామల్లేశ్వర సర్వదేవ పరివారా! హారహీరాకృతీ!

103. శా. నీమాహాత్మ్య మెఱుంగశక్యము సదానిర్ణిద్ర నిస్తంద్ర దీ
క్షామేధా మహితాశయ ప్రముదితస్వాంతప్రబోధోదయా
వ్యామోహాత్మ దయావిధేయులకు విద్యాశౌర్యధౌరేయ దు
ర్గామల్లేశ్వర సర్వదేవ పరివారా! హారహీరాకృతీ!

104. శా. నామీదన్నెనరుంపుమమ్మ సమఖండప్రాజ్యసామ్రాజ్య శా
స్త్రామేయ ప్రతిభాంఫురాసుకవితా సామ్రాజ్య సంపత్ప్రదా
నామోఘాశయహృత్కుశేశయదయా న్యాసా! మహోల్లాస దు
ర్గామల్లేశ్వర సర్వదేవ పరివారా! హారహీరాకృతీ!

105. శా. నామీదన్నెనరుంపుమయ్య! శివ! యన్న ప్రాణ చిత్తాది మూ
ర్తా ముర్తాంతర పంచకోశవిషయోపాత్తేశ జీవత్వ స
త్తా మాత్రాత్మ సుఖానుభూతి విలస ద్ధన్యత్వ సంపన్న దు
ర్గామల్లేశ్వర సర్వదేవ పరివారా! హారహీరాకృతీ!

106. శా. శ్యామ శ్రీభ్రమరాంబ! గౌరి! శివ! కూష్మాండేశ్వరీ! చంద్రఘం
టా! మాహేశ్వరి! సిద్ధధాత్రి! యుమ! కాత్యాయన్యభిఖ్యాంబ! లీ
లామాధ్వీక! మహాసరస్వతీ! మాహాలక్ష్మీ! మహాకాళి! దు
ర్గామల్లేశ్వర సర్వదేవ పరివారా! హారహీరాకృతీ!

107. శా. భ్రూమధ్యస్థ! చరారచస్థ! భవ! శంభూ! స్తంభితేంద్రావలే
పా! చాపాయుతమేరుభూమిధర! యష్టైశ్వర్య! దివ్యోదయా
ప్రామాణైక్య సులభ్య! భక్తజనతా వాసాగ్రమందార దు
ర్గామల్లేశ్వర సర్వదేవ పరివారా! హారహీరాకృతీ!

108. శా. గోమంతంబును సారవంతమునునౌ గోదావరీ కృష్ణవే
ణీ మధ్యంబున యందు దుర్గపురి వాణీగేయ సుధ్యేయ ది
వ్యామేయాలయఁ గోటవీరశరభ ప్రస్తుత్య నెక్కొంటి దు
ర్గామల్లేశ్వర సర్వదేవ పరివారా! హారహీరాకృతీ!

సమాప్తము